جگن کاظم کی علیزے شاہ سے معذرت، سوشل میڈیا پر مثبت ردعمل

پاکستانی شوبز انڈسٹری کی معروف اداکارہ، ماڈل اور میزبان جگن کاظم نے نوجوان اداکارہ علیزے شاہ کی شکایت پر فوری ردعمل دیتے ہوئے عوامی سطح پر معذرت کر لی، جسے سوشل میڈیا صارفین کی جانب سے مثبت اور بالغ نظری کا مظاہرہ قرار دیا جا رہا ہے۔

علیزے شاہ کا ویڈیو پیغام: ماضی کا زخم تازہ
چند روز قبل علیزے شاہ نے ایک ویڈیو بیان میں انکشاف کیا کہ شوبز انڈسٹری کے کچھ سینئرز کا رویہ تکلیف دہ رہا ہے۔انہوں نے دعویٰ کیا کہ چند سال قبل ایک موقع پر جگن کاظم نے ان کے گرنے کی نقل اتاری تھی، جس پر وہ خود کو شدید تذلیل اور شرمندگی کا شکار محسوس کرنے لگیں۔ علیزے کے مطابق یہ عمل مزاحیہ نہیں بلکہ تکلیف دہ تھا۔

جگن کاظم کا فوری، عاجزانہ ردعمل
علیزے کے بیان کے بعد جگن کاظم نے فوری طور پر اپنے سوشل میڈیا اکاؤنٹس پر ایک ویڈیو پیغام جاری کیا، جس میں انہوں نے کہا:"علیزے بیٹا! اگر میری کسی حرکت سے تمہیں دکھ پہنچا ہے تو میں دل سے معذرت خواہ ہوں۔"انہوں نے مزید کہا کہ:"یہ ویڈیو تقریباً چار سال پرانی ہے اور اس وقت مجھے اندازہ نہیں تھا کہ میری حرکت کسی کو اس حد تک ذہنی اذیت دے سکتی ہے۔"جگن نے واضح کیا کہ اگر علیزے ان سے براہِ راست رابطہ کرتیں تو وہ اسی وقت معافی مانگ لیتیں۔ انہوں نے یہ بھی اعتراف کیا کہ:"میں خود بھی شوبز میں بلِنگ (bullying) کا سامنا کر چکی ہوں، اس لیے تمہاری بات کو دل سے سمجھتی ہوں۔"
سوشل میڈیا پر جگن کا رویہ سراہا گیا
جگن کاظم کے اس بردبار، عاجزانہ اور سنجیدہ رویے کو سوشل میڈیا پر خوب سراہا جا رہا ہے۔ایک صارف نے لکھا:"جگن نے جو کیا، وہی رویہ ہر سینئر کو اپنانا چاہیے۔ یہ ان کی تربیت، ظرف اور انسانیت کا عکس ہے۔"
علیزے شاہ کی جرأت کو بھی خراجِ تحسین
دوسری جانب متعدد صارفین نے علیزے شاہ کی ہمت کو سراہا کہ انہوں نے اپنے جذبات کا اظہار کیا اور خاموش نہ رہیں۔سوشل میڈیا پر اس مکالمے کو مثبت تبدیلی کی علامت قرار دیا جا رہا ہے، جس میں سینئرز کی ذمہ داری اور نوجوان فنکاروں کی خود اعتمادی دونوں کو اجاگر کیا گیا۔