اسلام آباد: اسلام آباد ہائیکورٹ نے توشہ خانہ ٹو کیس میں بانی پی ٹی آئی عمران خان اور بشریٰ بی بی کی سزا کے خلاف دائر اپیلوں پر لگائے گئے اعتراضات سے متعلق اہم پیش رفت کرتے ہوئے دونوں کی متفرق درخواستیں منظور کر دیں اور اپیلوں کو نمبر لگا کر سماعت کے لیے مقرر کرنے کی ہدایت کر دی۔
سماعت کا خلاصہ:
جسٹس خادم حسین سومرو نے درخواستوں پر سماعت کی۔دورانِ سماعت بیرسٹر سلمان صفدر، سلمان اکرم راجہ اور دیگر وکلا پیش ہوئے، جب کہ بانی پی ٹی آئی کی تینوں بہنیں بھی عدالت میں موجود تھیں۔بیرسٹر سلمان صفدر نے مؤقف اختیار کیا کہ رجسٹرار آفس نے اپیلوں پر بلاجواز اعتراضات عائد کیے، جن میں وکالت نامہ پرانا ہونے، صفحات پر فلیگ نہ ہونا اور دستاویزات کی ترتیب درست نہ ہونے جیسے نکات شامل تھے۔
عدالت کے فیصلے اور ہدایات:
جسٹس خادم حسین سومرو نے ریمارکس دیے کہ صفحات کو فلیگ کر لیا جائے اور باقی ماندہ اعتراضات 7 روز میں دور کیے جائیں۔عدالت نے دونوں متفرق درخواستیں منظور کرتے ہوئے کہا کہ درخواستوں میں مرکزی اپیل پر اعتراضات دور کرنے اور اعتراضات کے لیے مہلت میں توسیع شامل تھی۔سماعت کے اختتام پر عدالت نے واضح کیا کہ فریقین کو خالی ہاتھ نہیں بھیجا جا رہا اور درخواستیں منظور کر لی گئی ہیں۔
