پیپلز پارٹی 15سال سے حکومت میں مگر کراچی میں پانی نہیں،مفتاح اسماعیل

 ملک میں ہم انتظامات ٹھیک نہیں کرسکے، 40فیصد پاکستانی آج بھی غربت میں رہتے ہیں، میڈیا سے گفتگو
 سکھر (آئی این پی ) عوام پاکستان پارٹی کے رہنما مفتاح اسماعیل نے کہا ہے کہ پیپلز پارٹی 15سال سے حکومت میں ہے مگر کراچی میں پانی نہیں۔ میڈیا سے گفتگو کرتے ہوئے انہوں نے کہا کہ قائداعظم کے دئیے ہوئے ملک میں ہم انتظامات ٹھیک نہیں کرسکے، 40فیصد پاکستانی آج بھی غربت میں رہتے ہیں۔ پاکستانی حکمران گورننس میں مکمل فیل ہوچکے ہیں،پاکستان کو حکمرانی کیلئے ایماندار لیڈر چاہیے، ہرپاکستانی کی معاشی حالت ٹھیک نہیں۔ طاقت وفاق سے صوبوں میں منتقل کی جائے،ڈسٹرکٹ اورڈویژن کو پاوردی جائے،مہنگی ترین بجلی سے ظاہرہوتا ہے کہ حکمرانی ٹھیک نہیں۔ انہوں نے مزید کہا کہ( ن) لیگ کس منہ سے بابائے قوم کے مزارپرحاضری دیگی،مسلم لیگ اورتحریک انصاف اپنے بیان  سے ہٹ گئی ہے، بچوں کو تعلیم اورروزگار نہیں دیں گے تو حالات بہترنہیں ہو سکتے، پی ٹی آئی اورحکومت مل کرکوئی حل نکالے۔