ویب ڈیسک : وفاقی وزیر داخلہ محسن نقوی نے معاشرے کے تمام طبقات سے محرم الحرام کے دوران فرقہ وارانہ ہم آہنگی کو یقینی بنانے کی اپیل کرتے ہوئے اسلام آباد میں سیکیورٹی و انتظامات کے حوالے سے اہم اجلاس کی صدارت کی۔
181 جلوس، 965 مجالس: مکمل سیکیورٹی پلان تیار
اجلاس میں ڈپٹی کمشنر اسلام آباد اور ڈی آئی جی اسلام آباد نے محرم الحرام کے دوران سیکیورٹی، ٹریفک اور دیگر متعلقہ امور پر بریفنگ دی۔بریفنگ میں بتایا گیا کہ:اسلام آباد میں 181 جلوس اور 965 مجالس منعقد ہوں گی۔تمام مجالس و جلوسوں کا سیکیورٹی آڈٹ مکمل کر لیا گیا ہے۔داخلی و خارجی راستوں پر سخت چیکنگ کی جائے گی۔
سیف سٹی کنٹرول روم اور جیو ٹیگنگ مکمل
وزیر داخلہ نے اجلاس میں ہدایت دی کہ:سیف سٹی پراجیکٹ کے تحت مرکزی کنٹرول روم قائم کر دیا گیا ہے۔تمام امام بارگاہوں، مجالس اور جلوسوں کے مقامات کی جیو ٹیگنگ مکمل ہو چکی ہے۔سیکیورٹی کے لیے درجاتی حصار (Multi-Layer Security) لگائے جائیں گے۔اشتعال انگیز مواد کے خلاف زیرو ٹالرنس پالیسی اپنائی جائے گی۔سوشل میڈیا کی سخت نگرانی کی جائے گی تاکہ کوئی نفرت انگیز مواد پھیلنے نہ پائے۔
اہلکاروں کی سہولت اور نظم و ضبط پر زور
محسن نقوی نے متعلقہ حکام کو ہدایت کی کہ:ڈیوٹی پر تعینات اہلکاروں کے کھانے پینے کے انتظامات کا خاص خیال رکھا جائے۔اہلکاروں کی شفٹ ڈیوٹیز بنائی جائیں تاکہ انہیں آرام کا موقع ملے اور وہ چاک و چوبند رہیں۔
امن و امان کیلئے علمائے کرام سے رابطہ، ضابطہ اخلاق کی پابندی پر زور
وفاقی وزیر داخلہ نے کہا کہ:"ملک دشمن عناصر کے عزائم ناکام بنانے کیلئے ہر ممکن سیکیورٹی انتظامات کیے جائیں۔ تمام مکاتب فکر کے علمائے کرام سے قریبی رابطہ رکھا جائے اور ضابطہ اخلاق کی سختی سے پابندی کرائی جائے۔"
اعلیٰ سطحی شرکت
اجلاس میں وزیر مملکت داخلہ طلال چوہدری، ایڈیشنل سیکرٹری داخلہ، ڈپٹی کمشنر اسلام آباد، اے ڈی سی جی، ڈی آئی جیز، ایس پیز اور تمام اسسٹنٹ کمشنرز نے شرکت کی۔
