13سالہ افغان لڑکا طیارے کے لینڈنگ گیئر میں چھپ کر دہلی پہنچنے میں کامیاب

نئی دہلی(آئی این پی )بھارتی اخبار کی  رپورٹ کے مطابق افغانستان سے تعلق رکھنے والا 13 سالہ لڑکا  مسافر طیارے کے لینڈنگ گیئر میں چھپ کر دہلی پہنچ گیا، جس کے بعد بھارتی حکام میں تشویش کی لہر دوڑ گئی۔لڑکا کابل ایئرپورٹ کے ممنوعہ حصے میں داخل ہونے میں کامیاب ہوا اور افغان ایئرلائن KAM کی پرواز RQ-4401 کے پچھلے مرکزی لینڈنگ گیئر کمپارٹمنٹ میں چھپ گیا، یہ پرواز تقریبا دو گھنٹے کے سفر کے بعد صبح 11 بجے دہلی پہنچی۔جہاز کے عملے نے لینڈنگ کے بعد لڑکے کو ایئرکرافٹ کے قریب گھومتے دیکھا اور فورا ایئرپورٹ سیکیورٹی کو اطلاع دی۔ابتدائی تحقیقات میں پتا چلا کہ وہ شمالی افغانستان کے شہر قندوز کا رہائشی ہے، عملے نے اسے حراست میں لے کر سینٹرل انڈسٹریل سیکیورٹی فورس (سی آئی ایس ایف ) کے حوالے کیا، جس کے بعد اسے پوچھ گچھ کے  لئے  ٹرمینل 3 منتقل کیا گیا۔تفتیش کے دوران لڑکے نے بتایا کہ اس نے یہ اقدام محض تجسس میں کیا اور اسے اس خطرناک فیصلے کے نتائج کا اندازہ نہیں تھا۔بعد ازاں حکام نے اسے اسی ایئرلائن کی پرواز کے ذریعے واپس افغانستان بھیج دیا