لاہور: باغوں کے شہر لاہور میں بارش کے بعد موسم خوشگوار ہو گیا ہے۔ آسمان پر بادل چھائے ہوئے ہیں جبکہ ٹھنڈی ہوائیں چلنے سے گرمی اور حبس کی شدت میں نمایاں کمی آ گئی ہے، جس سے شہریوں نے سکھ کا سانس لیا۔
محکمہ موسمیات کے مطابق شہر کا موجودہ درجہ حرارت 28 ڈگری سینٹی گریڈ ریکارڈ کیا گیا ہے، جبکہ آج زیادہ سے زیادہ درجہ حرارت 31 ڈگری اور کم سے کم 27 ڈگری سینٹی گریڈ رہنے کا امکان ہے۔محکمہ موسمیات نے لاہور میں آج 10 سے 70 فیصد بارش کا امکان ظاہر کرتے ہوئے کہا ہے کہ دن بھر مختلف علاقوں میں وقفے وقفے سے بارش کا سلسلہ جاری رہ سکتا ہے، جس سے موسم مزید خوشگوار ہونے کی توقع ہے۔رپورٹ کے مطابق اس وقت شہر میں 13 کلومیٹر فی گھنٹہ کی رفتار سے ٹھنڈی ہوائیں چل رہی ہیں، جبکہ ہوا میں نمی کا تناسب 86 فیصد ریکارڈ کیا گیا ہے، جس کے باعث فضا خوشگوار ہونے کے ساتھ مرطوب بھی محسوس کی جا رہی ہے۔
بارش کے باعث مختلف شاہراہوں اور نشیبی علاقوں میں پانی جمع ہونے کا خدشہ ہے، جس سے ٹریفک کی روانی متاثر ہو سکتی ہے۔ محکمہ موسمیات نے شہریوں کو مشورہ دیا ہے کہ موسمی صورتحال کے پیش نظر غیر ضروری سفر سے گریز کریں، بارش کے دوران احتیاط سے گاڑی چلائیں اور ٹریفک قوانین کی مکمل پابندی کریں۔ادھر بارش اور ٹھنڈی ہواؤں کے باعث پارکس، تفریحی مقامات اور سڑکوں پر شہری خوشگوار موسم سے لطف اندوز ہوتے دکھائی دیے، جبکہ آئندہ چند گھنٹوں کے دوران مزید بارش کے امکانات بھی ظاہر کیے جا رہے ہیں۔
