ویب ڈیسک: لاہور کے پوش علاقے ڈی ایچ اے کے فیز 6 میں ایک زیر تعمیر عمارت میں افسوسناک حادثہ پیش آیا، جہاں کرنٹ لگنے کے باعث 3 مزدور شدید زخمی ہو گئے۔
ریسکیو حکام کے مطابق واقعہ اس وقت پیش آیا جب مزدور لائٹس لگانے کے لیے کھدائی کر رہے تھے۔ریسکیو 1122 کے ترجمان نے بتایا کہ مزدور کام میں مصروف تھے کہ اچانک زمین کے اندر سے گزرنے والی بجلی کی تار کو چھونے سے زور دار جھٹکا لگا اور تینوں مزدور بے ہوش ہو کر گر پڑے۔ حادثے کے فوراً بعد ریسکیو ٹیم نے موقع پر پہنچ کر تینوں زخمیوں کو سی پی آر (CPR) دیتے ہوئے ایویسینا اسپتال منتقل کیا۔
مزدوروں کی حالت تشویشناک:
اسپتال ذرائع کے مطابق تینوں مزدوروں کی حالت انتہائی تشویشناک ہے اور انہیں ایمرجنسی وارڈ میں داخل کیا گیا ہے۔ ڈاکٹروں کا کہنا ہے کہ کرنٹ کی شدت بہت زیادہ تھی، جس سے جسم کے اہم اعضا متاثر ہوئے ہیں۔
حفاظتی اقدامات پر سوالیہ نشان:
حادثے کے بعد تعمیراتی سائٹ پر حفاظتی اقدامات کی کمی پر سوالات اٹھائے جا رہے ہیں۔ مقامی افراد اور ورکرز نے بتایا کہ اس سائٹ پر مزدوروں کو مناسب حفاظتی گیئر فراہم نہیں کیا گیا تھا، نہ ہی بجلی کی لائنوں کے حوالے سے کوئی پیشگی وارننگ یا نشان دہی موجود تھی۔
تحقیقات کا مطالبہ:
واقعے کے بعد پولیس اور ریسکیو حکام نے تحقیقات کا آغاز کر دیا ہے۔ مقامی انتظامیہ سے مطالبہ کیا جا رہا ہے کہ ذمہ داران کے خلاف سخت کارروائی کی جائے تاکہ مستقبل میں ایسے واقعات سے بچا جا سکے۔
