اسلام آباد پولیس کے ایک افسر کو خاتون ڈاکٹر کو ہراساں اور بلیک میل کرنے کے الزام میں نوکری سے برخاست کر دیا گیا ہے۔
تفصیلات کے مطابق، اسلام آباد کی ایک خاتون ڈاکٹر نے حال ہی میں ویڈیو بیان جاری کیا تھا، جس میں انہوں نے ایک پولیس افسر اور اس کے ساتھی پر الزام لگایا کہ وہ انہیں ہراساں اور دھمکیاں دے رہے تھے۔ خاتون نے پولیس افسران سے اس معاملے کا نوٹس لینے اور مناسب کارروائی کرنے کی اپیل کی تھی۔اسلام آباد پولیس کے ترجمان نے ایکس پر جاری بیان میں بتایا کہ خاتون ڈاکٹر کی شکایت پر سب انسپکٹر کے خلاف انکوائری مکمل کر لی گئی ہے۔ ڈی آئی جی اسلام آباد محمد جواد طارق نے افسر کو نوکری سے برخاست کر دیا ہے اور قانونی کارروائی کے لیے خاتون ڈاکٹر سے ضابطے کے مطابق رابطہ کیا جا چکا ہے تاکہ قانون کے تقاضے پورے کیے جا سکیں۔
ڈی آئی جی نے اس موقع پر کہا کہ اسلام آباد پولیس میں خود احتسابی کا منظم اور مضبوط عمل موجود ہے اور پولیس خدمت خلق کے جذبے کے تحت قانون کی بالادستی کے لیے کام کر رہی ہے۔یہ واقعہ اسلام آباد پولیس کے اندر شفافیت اور افسران کی ذاتی ذمہ داریوں کے حوالے سے ایک اہم مثال کے طور پر دیکھا جا رہا ہے۔
