پوپ لیو نے مہاجرین اور پناہ گزینوں کے ساتھ غیر انسانی سلوک پر گہری تشویش کا اظہار کیا اور کہا ہے کہ دنیا میں ان لوگوں کو اکثر پالتو جانوروں سے بھی بدتر سمجھا جاتا ہے۔
انہوں نے افریقا کے چار ممالک کے دورے کے بعد روم واپس آنے کے موقع پر یہ باتیں کیں اور انسانیت کے ناطے ان کے ساتھ ہمدردی اور انسانی برتاؤ کی ضرورت پر زور دیا۔ انہوں نے امیر ممالک سے درخواست کی کہ وہ غریب ممالک کی ترقی، فلاح و بہبود اور معاشی حالت بہتر بنانے کے لیے کام کریں تاکہ لوگوں کو مجبوراً ہجرت کرنا نہ پڑے۔ پوپ لیو نے کسی خاص ملک کا ذکر کیے بغیر کہا کہ ریاستوں کو اپنی سرحدوں کے تحفظ کا حق ہے، مگر اصل مسئلہ ان حالات کو بہتر بنانا ہے جن کی وجہ سے لوگ نقل مکانی پر مجبور ہوتے ہیں۔
پوپ لیو نے اس بات پر بھی زور دیا کہ وہ ہر قسم کی ناانصافی، انسانی حقوق کی پامالی اور انسانی جانوں کے ضیاع کے خلاف آواز بلند کرتے رہیں گے۔ انہوں نے جنگ کے خاتمے، امن کے قیام، مکالمہ اور عالمی سطح پر تعاون کے فروغ کے لیے اپنی کوششیں جاری رکھنے کا عزم ظاہر کیا۔ یہ بیان عالمی برادری کو انسانی حقوق، ہمدردی اور انسانیت کی خدمت کی یاد دہانی ہے، جس میں انہوں نے انسانیت کے ناطے سب کو ذمہ داری کا مظاہرہ کرنے کی ترغیب دی۔
