یوٹیوبر ڈکی بھائی کو عدالت سے ریلیف مل گیا

سعد الرحمان کے خلاف زیرِ سماعت مقدمے میں اہم پیش رفت سامنے آئی ہے، جہاں عدالت میں ان کے نام کو پاسپورٹ کنٹرول لسٹ سے نکالنے کے معاملے پر سماعت ہوئی۔

ضلع کچہری میں نعیم وٹو (جوڈیشل مجسٹریٹ) نے کیس کی سماعت کی، جس دوران ڈکی بھائی سمیت دیگر ملزمان عدالت میں پیش ہوئے اور اپنی حاضری مکمل کروائی۔یہ مقدمہ نیشنل سائبر کرائم انویسٹیگیشن ایجنسی کی جانب سے مبینہ طور پر آن لائن جوا ایپس کی پروموشن کے الزام میں درج کیا گیا ہے۔عدالت میں جمع کروائی گئی رپورٹ کے مطابق ابتدائی طور پر تفتیش میں عدم تعاون کے باعث سعد الرحمان کا نام پی این آئی ایل (PNIL) میں شامل کیا گیا تھا، تاہم بعد ازاں ضمانت حاصل کرنے کے بعد انہوں نے تفتیش میں تعاون کیا۔

تفتیشی حکام نے عدالت کو آگاہ کیا کہ اب ان کے نام کو پاسپورٹ کنٹرول لسٹ سے نکالنے پر کوئی اعتراض نہیں رہا، اور اس حوالے سے متعلقہ حکام کو باقاعدہ سفارش بھی بھجوا دی گئی ہے۔اس پیش رفت کو سعد الرحمان کے لیے ایک اہم ریلیف قرار دیا جا رہا ہے، تاہم کیس کی سماعت بدستور جاری ہے۔