پاکستان اس وقت امریکا اور ایران کے درمیان جاری کشیدگی کو کم کرنے اور مذاکراتی عمل کو مکمل طور پر ناکام ہونے سے بچانے کے لیے ایک سفارتی کردار ادا کر رہا ہے۔
رپورٹ میں کہا گیا ہے کہ دونوں ممالک کے درمیان بڑھتی ہوئی کشیدگی، اقتصادی پابندیاں اور حالیہ فوجی صورتحال نے مذاکرات کو نہایت نازک مرحلے میں پہنچا دیا ہے، جہاں باہمی اعتماد کی کمی ایک بڑی رکاوٹ بنی ہوئی ہے۔رپورٹ کے مطابق اس سفارتی عمل میں فیلڈ مارشل عاصم منیر کو ایک اہم اور غیر روایتی کردار کے طور پر دیکھا جا رہا ہے، جو دونوں فریقین کے درمیان رابطے اور پیغام رسانی کے تسلسل کو برقرار رکھنے کی کوشش کر رہے ہیں۔ذرائع کے مطابق پاکستان کی کوشش ہے کہ دونوں ممالک کے درمیان براہِ راست یا بالواسطہ رابطے جاری رہیں تاکہ مذاکراتی چینل مکمل طور پر بند نہ ہو اور خطے میں مزید کشیدگی سے بچا جا سکے۔
تجزیہ کاروں کا کہنا ہے کہ اگر یہ سفارتی کوششیں کامیاب ہو جاتی ہیں تو نہ صرف علاقائی سطح پر استحکام پیدا ہو سکتا ہے بلکہ عالمی سطح پر بھی کشیدگی میں کمی کے امکانات بڑھ جائیں گے۔رپورٹ میں یہ بھی کہا گیا ہے کہ موجودہ صورتحال میں کسی بھی پیش رفت کے لیے اعتماد سازی سب سے بڑا چیلنج ہے، تاہم پاکستان کا کردار ان کوششوں میں ایک اہم رابطہ کار کے طور پر سامنے آ رہا ہے۔
