پاکستانی کرکٹر آصف آفریدی نے اپنے شاندار کھیل سے ایک تاریخی ریکارڈ توڑ دیا ہے۔
انہوں نے انگلینڈ کے سابقہ کھلاڑی چارلس میریٹ کا 92 سال پرانا ریکارڈ شکست دے دیا ہے۔آصف آفریدی نے جنوبی افریقہ کے خلاف راولپنڈی ٹیسٹ کے دوران ڈیبیو پر پانچ وکٹیں حاصل کرکے معمر ترین کرکٹر بننے کا اعزاز حاصل کیا۔ اس موقع پر ان کی عمر 38 سال اور 299 دن تھی، جو کہ اس سے پہلے موجود ریکارڈ سے زیادہ ہے۔ انگلینڈ کے چارلس میریٹ نے 1933 میں 37 سال اور 332 دن کی عمر میں ڈیبیو پر پانچ وکٹیں لی تھیں۔
یاد رہے کہ جنوبی افریقا کے خلاف پہلے ٹیسٹ میچ میں آصف آفریدی کو ٹیم میں شامل نہیں کیا گیا تھا، تاہم پاکستان کی ٹیم نے پہلے ٹیسٹ جیتنے کے بعد سیریز کے دوسرے اور آخری ٹیسٹ میں انہیں شامل کیا۔ اس تاریخ ساز کارکردگی کے ساتھ، آصف آفریدی نے نہ صرف اپنی صلاحیتوں کا مظاہرہ کیا بلکہ ایک اہم سنگ میل بھی عبور کیا۔
