وفاقی وزیر داخلہ محسن نقوی نے اہم ملاقات کی ہے جس میں انہوں نے چیئرمین سنی تحریک محمد ثروت اعجاز قادری سے ملاقات کی۔
اس ملاقات میں دونوں رہنماؤں نے مذہبی ہم آہنگی کے فروغ کی ضرورت پر زور دیا اور اس سلسلے میں مل کر کام کرنے کے عزم کا اظہار کیا۔اس موقع پر سندھ کے سینئر وزیر شرجیل انعام میمن اور صوبائی وزیر سید ناصر حسین شاہ بھی محسن نقوی کے ہمراہ تھے۔ملاقات کے دوران علمائے کرام کی گراں قدر خدمات کو خراج تحسین پیش کیا گیا اور ان کی اہمیت کو سراہا گیا۔محسن نقوی نے کہا کہ حالیہ دنوں میں مدارس یا مساجد کی بندش کے حوالے سے بعض پروپیگنڈا کیا جا رہا ہے، تاہم انہوں نے واضح کیا کہ کسی بھی مدرسے یا مسجد کو بند نہیں کیا جائے گا۔ انہوں نے بتایا کہ دین اسلام امن اور محبت کا درس دیتا ہے اور یہاں تشدد یا شرانگیزی کی کوئی گنجائش نہیں ہے۔
انہوں نے مزید کہا کہ معرکہ حق میں علمائے کرام کا کردار بہت اہم رہا ہے۔ پاکستان ترقی کے راستے پر گامزن ہے اور اس وقت سب کو مثبت کردار ادا کرنے کی ضرورت ہے۔ قانون کے دائرے میں ہر کسی کو احتجاج کا حق حاصل ہے، اور آج پاکستان کے لیے سب کو یکجا ہونے کی ضرورت ہے۔اس موقع پر چیئرمین پاکستان سنی تحریک ثروت اعجاز قادری نے مذہبی ہم آہنگی کے فروغ کے لیے مکمل تعاون کی یقین دہانی کرائی۔
