ویب ڈیسک:آرمی چیف جنرل سید عاصم منیر نے پشاور کا دورہ کیا اور وہاں انہیں موجودہ سیکیورٹی صورتحال پر بریفنگ دی گئی۔
اس بریفنگ میں خطے میں جاری انسدادِ دہشت گردی آپریشنز کی پیشرفت پر جامع معلومات فراہم کی گئیں۔ اس موقع پر وزیراعلیٰ خیبرپختونخوا اور فیلڈ کمانڈرز بھی موجود تھے۔آرمی چیف نے اس موقع پر پاک فوج کے جوانوں کی قربانیوں اور حوصلے کو سراہا اور شہداء اور غازیوں کو زبردست خراجِ تحسین پیش کیا۔ انہوں نے کہا کہ یہ قربانیاں مسلح افواج اور قانون نافذ کرنے والے اداروں کے غیر متزلزل جذبے، آپریشنل تیاری اور لگن کو مزید تقویت دیتی ہیں اور یہ قربانیاں قومی عزم کی بنیاد فراہم کرتی ہیں۔
جنرل عاصم منیر نے اپنے خطاب میں اس عزم کا اعادہ کیا کہ دشمن دہشت گرد نیٹ ورکس کو ختم کرنا اور قومی سلامتی کو نقصان پہنچانے والے غیر قانونی عناصر کو جڑ سے اکھاڑ پھینکنا پاک فوج کی اولین ترجیح ہے۔ انہوں نے مزید کہا کہ فوجی عزم، بلند حوصلے اور آپریشنل تیاری کے ساتھ پاک فوج دہشت گردی کے خلاف کامیابی حاصل کر رہی ہے، اور اس کامیابی کا سلسلہ جاری رہے گا۔
آرمی چیف کا کہنا تھا کہ یہ آپریشنز اور قربانیاں ملک میں امن و سکون کے قیام اور قومی سلامتی کے تحفظ کے لیے کیے جا رہے ہیں، اور مسلح افواج ہر قیمت پر دشمن کے مذموم عزائم کو ناکام بنائیں گی۔
