شوبز میں بطور چائلڈ اسٹار کیریئر کا آغاز کرنے والی بھارتی اداکارہ جنت زبیر نے انسٹاگرام پر بالی ووڈ کے بادشاہ شاہ رخ خان کو فالوورز کی تعداد میں پیچھے چھوڑ دیا ہے۔
جنت زبیر کے انسٹاگرام فالوورز کی تعداد 49.7 ملین تک پہنچ گئی ہے، جب کہ شاہ رخ خان کے فالوورز کی تعداد 47.7 ملین ہے۔ اس کامیابی نے ڈیجیٹل تخلیق کاروں کی بڑھتی ہوئی اہمیت کو اجاگر کیا ہے، کیونکہ جنت نے اداکاری سے لے کر سوشل میڈیا انفلوئنسر تک کا سفر طے کیا ہے اور مداحوں کے ساتھ گہرا تعلق قائم کیا ہے۔جنت زبیر اپنی دلچسپ پوسٹس، ذاتی تجربات، اور مداحوں کے ساتھ مستقل رابطے کی بدولت انسٹاگرام پر بے حد مقبول ہیں۔ ان کی دلکش شخصیت نے انہیں سوشل میڈیا پر نمایاں مقام دیا ہے۔
اداکاری میں جنت کا آغاز چائلڈ ایکٹر کے طور پر ہوا تھا، جہاں انہوں نے مشہور ٹی وی شوز جیسے ’پھولوا‘ اور ’تو عاشقی‘ میں کام کیا۔ وقت گزرنے کے ساتھ، وہ بھارت کی معروف ڈیجیٹل تخلیق کاروں میں شامل ہو گئیں۔ جنت نے ’خطروں کے کھلاڑی 12‘ اور ’لافٹر شیفس انلمیٹڈ انٹرٹینمنٹ‘ جیسے شو میں بھی حصہ لے کر اپنی کامیاب سوشل میڈیا اور ٹی وی کیریئر کو مزید مستحکم کیا۔
