اسرائیلی فوج نے غزہ میں خون کی ہولی کھیلنے کے بعد جنگ بندی معاہدہ بحال کردیا

  غزہ میں جنگ بندی دوبارہ بحال ہوگئی،اسرائیل نے جنگ بندی کے بعد سے اب تک 80 بار خلاف ورزیاں کیں
 حماس معاہدے کے تحت عمل کر رہی ہے،  غزہ جنگ بندی معاہدہ 100فیصد کامیاب ہوگا،  ناکامی کے متحمل نہیں ہو سکتے،  ایلچی 
غزہ،تل ابیب(آئی این پی )جارح اسرائیل نے سیز  فائر  معاہدے کی سنگین خلاف ورزیوں کے دوران درجنوں فلسطینیوں کو  شہید کرنے کے بعد  جنگ بندی  کے نفاذ پر پھر سے عمل درآمد شروع کرنے کا اعلان کردیا۔ اسرائیلی فوج نے غزہ میں سرنگوں سمیت حماس کے درجنوں اہداف پر 120 راکٹ حملے کیے، اسرائیلی فوج نے حماس کا بہانہ بنا کر  غزہ میں شہری آبادی کو  بھی نشانہ بنایا۔قابض فوج کی جانب سے خان یونس کے شمال مغربی علاقے میں  بے گھر افراد کے خیموں  اور  غزہ کے نصیرات کیمپ پر  بھی بمباری کی گئی۔ جنگ بندی کے باوجود اسرائیلی فوج کے غزہ پر فضائی حملوں میں   گزشتہ 24گھنٹوں میں    45 فلسطینیوں نے جام شہادت نوش کیا تاہم 10 اکتوبر کو جنگ بندی نافذ ہونے کے بعد اسرائیلی فوج کے ہاتھوں غزہ میں 98 فلسطینی شہید ہوچکے ہیں۔اسرائیلی فوج نے کہا کہ یہ حملے حماس کی جانب سے ان کے اہلکاروں پر حملوں کے جواب میں کیے گئے  تاہم حماس نے ان الزامات کو مسترد کرتے ہوئے واضح کردیا کہ اسرائیل جنگ دوبارہ شروع کرنے کے لیے بہانے ڈھونڈ رہا ہے۔