پنجاب اسمبلی میں مسلم لیگ (ن) کی رکن حنا پرویز بٹ نے ایک قرارداد جمع کروائی ہے جس میں چیف آف آرمی اسٹاف جنرل سید عاصم منیر کو فیلڈ مارشل کے عہدے پر ترقی دینے کے وفاقی کابینہ کے فیصلے کی مکمل تائید اور حمایت کی گئی ہے۔
قرارداد کے متن میں کہا گیا ہے کہ جنرل عاصم منیر کی قیادت میں افواجِ پاکستان نے "معرکۂ حق" اور "آپریشن بنیان مرصوص" میں دشمن کو شکست دے کر ایک عظیم قومی فتح حاصل کی۔ ایوان نے جنرل عاصم منیر کی قائدانہ صلاحیتوں کو سراہتے ہوئے دعا کی کہ ان کی قیادت میں افواجِ پاکستان مزید مضبوط ہو۔ اس سے قبل، 20 مئی 2025 کو وفاقی کابینہ نے جنرل عاصم منیر کو فیلڈ مارشل کے عہدے پر ترقی دینے کی منظوری دی تھی۔ یہ اعزاز پاکستان کی عسکری تاریخ میں صرف دوسری بار دیا گیا ہے؛ اس سے قبل صرف جنرل محمد ایوب خان کو یہ رتبہ حاصل ہوا تھا۔ فیلڈ مارشل کا رینک جنرل کے مقابلے میں بلند تر اور ایک اعزازی و فیصلہ کن مقام رکھتا ہے، جو عموماً پانچ ستاروں والا (Five-Star) درجہ سمجھا جاتا ہے۔
جنرل عاصم منیر کی قیادت میں افواجِ پاکستان نے "آپریشن بنیان مرصوص" کے دوران دشمن کے جارحانہ عزائم کو ناکام بنایا، جس پر وزیراعظم شہباز شریف اور صدر مملکت آصف علی زرداری سمیت دیگر سیاسی رہنماؤں نے انہیں مبارکباد پیش کی۔ اس اقدام کو پاکستان کی علاقائی سالمیت کے دفاع اور دشمن کو شکست دینے میں ان کی جرأت مندانہ قیادت کا اعتراف قرار دیا گیا۔
