پاکستان وناسپتی مینوفیکچرر ایسوسی ایشن (PVMA) کی جانب سے گھی اور کوکنگ آئل ملز بند کرنے کی دھمکی کے بعد ملک بھر میں ان اشیائے ضروریہ کی قیمتوں میں اضافے کا خدشہ بڑھ گیا ہے۔
مطالبات تسلیم نہ ہونے پر غیر معینہ ہڑتال کا اعلان:
ایسوسی ایشن کے صدر عمر ریحان شیخ نے ایک پریس کانفرنس میں خبردار کیا ہے کہ اگر فیڈرل بورڈ آف ریونیو (ایف بی آر) کی سخت شرائط اور ملز میں تعینات افسران کے معاملے پر جمعہ تک مطالبات تسلیم نہ کیے گئے تو ملک بھر کی گھی و آئل ملز غیر معینہ مدت کے لیے بند کر دی جائیں گی۔ان کا کہنا تھا کہ یہ محض ایک دن کی ہڑتال نہیں ہوگی، بلکہ مکمل سپلائی معطل کر دی جائے گی، جس کے نتیجے میں مارکیٹ میں گھی اور آئل کی قلت پیدا ہونے کا خدشہ ہے۔
حکومت سے اہم مطالبات:
عمر ریحان نے حکومت سے درج ذیل مطالبات کیے ہیں:ایف بی آر کی جانب سے تعینات اہلکاروں کو فوری واپس بلایا جائے۔سیکشن 40 بی، ڈیجیٹل انوائسنگ، اور دو لاکھ روپے سے زائد بینک ٹرانزیکشن پر پابندی کو ختم کیا جائے۔کاروبار دوست ماحول فراہم کیا جائے تاکہ صنعت بغیر رکاوٹ چلتی رہے۔
ایف بی آر کی کارروائی پر صنعت کاروں کا ردعمل:
واضح رہے کہ ایف بی آر نے سیکشن 40 بی کے تحت مختلف گھی و آئل ملز میں اپنے افسران تعینات کر دیے ہیں، جس کا مقصد ممکنہ ٹیکس چوری کو روکنا ہے۔ تاہم اس اقدام سے گھی انڈسٹری میں بے چینی اور خوف کی فضا قائم ہو چکی ہے۔
ممکنہ مہنگائی کی لہر:
صنعت کاروں نے خبردار کیا ہے کہ اگر گھی و آئل کی سپلائی معطل ہوئی تو نہ صرف مہنگائی میں اضافہ ہوگا بلکہ سپلائی چین متاثر ہونے سے عام صارفین براہ راست متاثر ہوں گے۔
