سوشل میڈیا پلیٹ فارم ٹک ٹاک نے پاکستان میں کمیونٹی گائیڈ لائنز کی خلاف ورزی کرنے والی 2 کروڑ 81 لاکھ 98 ہزار 284 ویڈیوز حذف کرنے کا اعلان کیا ہے۔
ٹک ٹاک کی تازہ رپورٹ کے مطابق یہ اعداد و شمار مالی سال 2025-26 کی تیسری سہ ماہی (جولائی تا ستمبر) کے دوران ریکارڈ کیے گئے۔ رپورٹ میں بتایا گیا کہ حذف شدہ ویڈیوز میں سے 99.8 فیصد خودکار نظام کے ذریعے شناخت کی گئی تھیں، اور 95.9 فیصد ویڈیوز اپلوڈ ہونے کے 24 گھنٹوں کے اندر ہٹا دی گئی تھیں۔ٹک ٹاک کے مطابق، خودکار ٹیکنالوجی زیادہ تر کام سنبھالتی ہے، جبکہ انسانی ٹیمیں ان معاملات پر توجہ دیتی ہیں جہاں انسانی فیصلہ ضروری ہو، جیسے اپیلوں کا جائزہ لینا، ماہرین کی رہنمائی شامل کرنا، اور فوری ردعمل دینا۔عالمی سطح پر اسی سہ ماہی میں، ٹک ٹاک نے 20 کروڑ 40 لاکھ ویڈیوز حذف کیں، جو کل اپلوڈ شدہ مواد کا تقریباً 0.7 فیصد بنتی ہیں۔ حذف شدہ ویڈیوز میں سے 18 کروڑ 66 لاکھ 8 ہزار 81 خودکار نظام کے ذریعے نشاندہی کی گئیں، جبکہ مزید 89 لاکھ 50 ہزار 735 ویڈیوز کے بعد جائزہ لینے پر بحال کر دی گئیں۔اسی عرصے میں، ٹک ٹاک نے اپنی سالمیت برقرار رکھنے کے لیے 11 کروڑ 86 لاکھ 18 ہزار 399 جعلی اکاوٴنٹس حذف کیے، اور 2 کروڑ 22 لاکھ 26 ہزار 542 ایسے اکاوٴنٹس بھی ہٹائے جو 13 سال سے کم عمر صارفین کے شبہ میں تھے۔
رپورٹ میں مزید بتایا گیا کہ حذف شدہ ویڈیوز کا 30 فیصد حساس یا بالغ مواد تھا، 15.7 فیصد ویڈیوز نے پلیٹ فارم کے تحفظ اور شائستگی کے معیار کی خلاف ورزی کی، 2.7 فیصد ویڈیوز نے رازداری اور سیکیورٹی کے اصولوں کی خلاف ورزی کی، جبکہ 32.9 فیصد ویڈیوز کو غلط معلومات کے طور پر اور 34.4 فیصد ویڈیوز کو ترمیم شدہ یا مصنوعی ذہانت سے تیار شدہ مواد کے طور پر شناخت کیا گیا۔ٹک ٹاک کی یہ رپورٹ ظاہر کرتی ہے کہ پلیٹ فارم نہ صرف مواد کی نگرانی اور کنٹرول کے لیے سنجیدہ اقدامات کر رہا ہے بلکہ صارفین کے لیے شفاف اور محفوظ ڈیجیٹل ماحول فراہم کرنے کے لیے بھی مکمل طور پر پرعزم ہے۔
