امریکا کے صدر ڈونلڈ ٹرمپ کی حلف برداری کی تقریب 15 جنوری کو واشنگٹن ڈی سی میں منعقد ہوئی، جس میں صرف وی وی آئی پیز ہی شریک ہو پائے، اور اس میں سخت سیکیورٹی اور کڑاکے کی سردی کی وجہ سے کئی اہم شخصیات کی شرکت میں مشکلات پیش آئیں۔
اس تقریب میں شرکت کے لیے مختلف عالمی رہنما اور اہم شخصیات کو دعوت دی گئی تھی، تاہم ان میں سے کئی کو سیکیورٹی اور موسم کی شدت کے باعث تقریب میں شرکت کا موقع نہیں ملا۔پاکستان کی نمائندگی سفیرِ پاکستان رضوان سعید شیخ نے کی، جو تقریب میں ڈپلومیٹک انکلیو میں موجود تھے، لیکن پاکستان کے وزیرِ داخلہ محسن نقوی کی شرکت کے بارے میں کوئی واضح اطلاع نہیں مل سکی۔ بھارت کی جانب سے وزیرِ خارجہ جے شنکر نے اس تقریب میں شرکت کی، اور وہ بھارتی وزیراعظم نریندر مودی کے خصوصی مندوب کے طور پر وہاں موجود تھے۔امریکا کے سابق صدور بل کلنٹن، بش اور براک اوباما بھی اس تقریب کا حصہ بنے، جبکہ ہیلری کلنٹن، مشعل اوباما اور دیگر اہم شخصیات نے تقریب میں شرکت نہیں کی۔ اس کے علاوہ سابق نائب صدور مائیک پنس اور ڈین کوائل، اور ری پبلکن صدارتی امیدوار ووک رامسوامی بھی تقریب میں شریک ہوئے۔ نیویارک کے میئر ایریک ایڈمز سمیت متعدد امریکی حکومتی ارکان نے بھی اس تاریخی موقع پر شرکت کی۔
کاروباری شخصیات جیسے ایلون مسک، جیف بیزوس، مارک زکربرگ، سیم آلٹمین، روپرٹ مرڈوک، اور گوگل کے سی ای او سندر پچائی نے بھی حلف برداری کی تقریب میں شرکت کی۔ ان کے علاوہ کامیڈین تھیو وان، باکسر جیک پال اور ریسلر لوگن پال جیسے معروف شخصیات بھی اس تقریب کا حصہ بنیں۔پاکستانی امریکن ری پبلکن رہنما جاوید انور، جو ٹرمپ کے قریبی اتحادی ہیں اور کئی بار ان سے ملاقات کر چکے ہیں، نے سیکیورٹی کے مسائل کی وجہ سے انڈور تقریب میں شرکت سے گریز کیا۔ جاوید انور نے تقریب میں اپنے بیٹے اور بہو کو نمائندگی کے لیے بھیجا۔ جاوید انور کے قریب تعلقات ٹرمپ اور ری پبلکنز کے ساتھ ہیں اور انہوں نے ٹرمپ کی انتخابی مہم اور ری پبلکنز کو 3 ملین ڈالرز بھی عطیہ کیے ہیں۔ایونٹ کی سیکیورٹی بہت سخت تھی، اور شرکاء کو سردی کے باعث بیرونی تقریب میں طویل فاصلہ طے کرنا پڑا۔
اس وجہ سے کئی اہم شخصیات اور دعوت یافتگان تقریب میں شریک نہ ہو سکے۔ پاکستان تحریک انصاف (پی ٹی آئی) کے رہنما قاسم سوری، طاہر صادق، سجاد برکی، عاطف خان، ڈاکٹر ملک اور ڈاکٹر سائرہ بلال کو بھی اس تقریب میں شرکت کے لیے دعوت دی گئی تھی، تاہم ایونٹ انڈور منعقد ہونے کی وجہ سے ان افراد کو معذرت کی گئی۔پارٹی ذرائع کے مطابق پیپلز پارٹی کے چیئرمین بلاول بھٹو زرداری بھی اس تقریب میں شریک نہیں ہوئے۔ ان کے بارے میں غیر مصدقہ اطلاعات سامنے آئی تھیں کہ انہیں دعوت نامہ ملا ہے، لیکن انہیں باضابطہ طور پر دعوت نہ ملنے کی وجہ سے بلاول بھٹو نے تقریب میں شرکت سے گریز کیا۔
یاد رہے کہ ایوانِ نمائندگان کے سارجنٹ ایٹ آرمز کی جانب سے ہاؤس افسران کو پیغام دیا گیا تھا کہ ان کے علاقے کے نمائندے اس تقریب میں شرکت نہیں کر پائیں گے اور جاری کردہ ٹکٹ محض یادگاری سمجھے جائیں گے۔
