بالی ووڈ کے لیجنڈری سپر اسٹار امیتابھ بچن نے ممبئی میں اپنے اوشیوارا ڈپلیکس اپارٹمنٹ کو 83 کروڑ روپے میں فروخت کر کے حیرت انگیز منافع حاصل کیا ہے۔
یہ پراپرٹی اٹلانٹس میں واقع ہے، جو اوشیوارا میں کرسٹل گروپ کے زیر اہتمام ایک رہائشی منصوبہ ہے۔امیتابھ بچن نے یہ اپارٹمنٹ اپریل 2021 میں صرف 31 کروڑ روپے میں خریدا تھا، اور صرف چار سال بعد 168 فیصد منافع کے ساتھ اسے 83 کروڑ روپے میں فروخت کر دیا۔اس سے قبل، نومبر 2021 میں، اس اپارٹمنٹ کو اداکارہ کریتی سینن کو 10 لاکھ روپے ماہانہ کرایہ اور 60 لاکھ روپے کی سیکیورٹی ڈپازٹ کے ساتھ کرایہ پر دیا گیا تھا۔
2024 میں بچن خاندان نے رئیل اسٹیٹ میں 100 کروڑ روپے سے زیادہ کی سرمایہ کاری کی، جس میں اوشیوارا اور ماگاتھنے (بوریوالی ایسٹ) میں رہائشی اور تجارتی جائیدادوں پر توجہ مرکوز کی گئی تھی۔امیتابھ بچن کا رئیل اسٹیٹ پورٹ فولیو ان کے اسٹریٹجک سرمایہ کاری کے نقطہ نظر کی عکاسی کرتا ہے، جو 2020 سے 2024 تک 200 کروڑ روپے سے تجاوز کر چکا ہے۔ یہ سرمایہ کاری بچن خاندان کے مالی حکمت عملی کی مضبوط بنیاد کو ظاہر کرتی ہے۔
