دریاؤں میں پانی کا بہاؤ بڑھ گیا، مون سون بارشوں اور گلیشیئرز پگھلنے کی وجہ سے

پنجاب میں حالیہ بارشوں اور گلیشیئرز کے پگھلنے کے باعث دریاؤں میں پانی کے بہاؤ میں اضافہ ہو گیا ہے، جس پر پنجاب ڈیزاسٹر مینجمنٹ اتھارٹی (PDMA) نے شہریوں کے لیے ہنگامی وارننگ جاری کی ہے۔

دریاؤں کی موجودہ صورتحال کے مطابق:

دریائے راوی کے اہم مقامات پر پانی کا بہاؤ معمول کے مطابق ہے، تاہم پلکھو اور بسنتر نالہ میں نچلے درجے کا سیلاب ریکارڈ کیا گیا ہے۔
دریائے چناب میں بھی پانی کا بہاؤ معمول پر ہے۔
ڈی جی خان ڈویژن کے پہاڑی نالوں میں فی الحال کوئی بہاؤ نہیں ہے۔
تربیلا ڈیم 100 فیصد اور منگلا ڈیم 74 فیصد تک بھر چکے ہیں۔
ڈی جی پی ڈی ایم اے نے شہریوں کو ہدایت کی ہے کہ وہ دریا کنارے اور پاٹ میں موجود علاقوں سے فوری طور پر محفوظ مقامات پر منتقل ہوں اور ہنگامی انخلا کی صورت میں ضلعی انتظامیہ کا مکمل تعاون کریں۔

شہریوں سے تاکید کی گئی ہے کہ:

دریاؤں، نہروں، ندی نالوں اور تالابوں میں نہانے سے گریز کریں۔
سیلابی صورتحال میں دریا کنارے سیر و تفریح سے پرہیز کریں۔
بچوں کو کسی صورت دریاؤں یا ندی نالوں کے قریب نہ جانے دیا جائے۔
پی ڈی ایم اے نے واضح کیا ہے کہ متعلقہ ادارے الرٹ ہیں اور صورتحال کی مسلسل نگرانی جاری ہے تاکہ کسی بھی ہنگامی صورتحال میں فوری کارروائی کی جا سکے۔