بھارت کی فلم انڈسٹری بالی ووڈ میں کئی باصلاحیت فنکار گزرے ہیں، جن میں اکشے کمار اور ٹائیگر شروف جیسے اداکار بھی شامل ہیں جو مارشل آرٹس میں مہارت رکھتے ہیں۔
انہی میں ایک نام مہیش آنند کا بھی ہے، جو کراٹے میں بلیک بیلٹ ہولڈر تھے اور اپنی منفرد ولن اداکاری کے باعث 1980 اور 1990 کی دہائی میں خاصی شہرت رکھتے تھے۔مہیش آنند نے اپنے کیریئر کا آغاز بطور ماڈل اور ڈانسر کیا، اور 1982 کی فلم صنم تیری قسم کے ٹائٹل گانے میں بیک گراؤنڈ ڈانسر کے طور پر نظر آئے، جس میں کمل ہاسن اور رینا رائے نے مرکزی کردار ادا کیے تھے۔ بطور اداکار انہوں نے 1984 میں فلم کرشمہ سے ڈیبیو کیا، تاہم اصل پہچان انہیں 1988 کی فلم شہنشاہ سے ملی، جس میں انہوں نے امیتابھ بچن کے ساتھ کام کیا۔اپنے کیریئر میں انہوں نے 300 سے زائد فلموں میں کام کیا اور سنجے دت، گووندا، ششی کپور، سنی دیول، ونود کھنہ اور سلمان خان جیسے بڑے ستاروں کے ساتھ اسکرین شیئر کی۔ فلمیں جیسے گمراہ، گنگا جمنا سرسوتی اور طوفان میں ان کے کردار کافی مقبول رہے۔
لیکن جہاں ایک طرف فلمی کامیابیاں تھیں، وہیں ذاتی زندگی مسائل سے بھری رہی۔ مہیش آنند نے پانچ شادیاں کیں، جن میں اریکا ماریا ڈی سوزا اور اوشا بچانی شامل ہیں، مگر کوئی بھی رشتہ زیادہ دیر نہ چل سکا۔ وقت کے ساتھ ان کا کیریئر بھی زوال کا شکار ہوا اور وہ مالی مشکلات، تنہائی اور شراب نوشی کا شکار ہوگئے۔2019 میں انہوں نے گووندا کی فلم رنگیلا راجہ سے کم بیک کی کوشش کی، مگر یہ امید زیادہ دیر قائم نہ رہ سکی۔ فلم کی ریلیز کے صرف 22 دن بعد، 9 فروری 2019 کو وہ اپنے گھر میں مردہ پائے گئے۔ رپورٹس کے مطابق، ان کی لاش کئی دن تک گھر میں پڑی رہی اور موت کو طبعی قرار دیا گیا۔مہیش آنند کی کہانی شہرت سے زوال تک کے ایک ایسے سفر کی عکاسی کرتی ہے، جو فلمی دنیا کی چمک دمک کے پیچھے چھپے تلخ حقائق کو بھی سامنے لاتی ہے۔
