اسرائیل کی فوج نے لبنان کی سرحد کے ساتھ پانچ روزہ فوجی مشقوں کا آغاز کیا ہے، جس کا مقصد "غیر متوقع حالات" سے نمٹنے کی تیاری کرنا بتایا گیا ہے۔
اسرائیلی حکام کے مطابق لبنان کے ساتھ جنگ ابھی ختم نہیں ہوئی اور کشیدگی کا خطرہ موجود ہے۔اس مشق کے دوران قصبے، ساحلی علاقے اور ہوم فرنٹ میں فوجی تربیت ہوگی، جس میں دھماکوں کی آوازیں، دشمن کی نقالی، ڈرونز، فضائی و بحری یونٹس اور سیکورٹی فورسز کی تیز نقل و حرکت شامل ہوگی۔ فوجی ترجمان اویشے ایدرائی نے بتایا کہ یہ مشق فوج کے 2025 کے تربیتی شیڈول کے تحت پہلے سے منصوبہ بندی شدہ ہے۔
دریں اثناء، اسرائیلی فوج نے جنوبی لبنان میں بھی دراندازی کی، جہاں ایتارون قصبے کے برقات المحافر علاقے میں کسانوں کو ان کی زمین سے دور دھکیلنے کی کوشش کی گئی۔ اس کے لیے چار کنکریٹ بلاکس پر انتباہی پیغامات لکھے گئے جن میں "داخلہ نہیں، موت کا خطرہ" درج تھا۔یہ فوجی سرگرمیاں ایسے وقت میں ہو رہی ہیں جب حزب اللہ نے غیر مسلح ہونے سے انکار کیا ہے اور دعویٰ کیا ہے کہ اس نے اپنی فوجی صلاحیتیں دوبارہ قائم کر لی ہیں۔
