معروف قانون دان ایس ایم ظفر کی دوسری برسی عقیدت واحترام سے منائی گئی

لاہور(آئی این پی) سابق وفاقی وزیر اور معروف قانون دان ایس ایم ظفر کو ہم سے بچھڑے 2 برس بیت گئے، مرحوم کی دوسری برسی عقیدت و احترام سے منائی گئی ۔ایس ایم ظفر کا پاکستان کی آئینی، قانونی اور سیاسی تاریخ سے گہرا رشتہ رہا، ملکی تاریخ کے کئی اہم مقدمات میں کامیابی کا سہرا آپ کے سر ہے، 2011 میں انہیں صدارتی ایوارڈ نشانِ امتیاز سے نوازا گیا۔سیاست، قانون اور انسانی حقوق کے آسمان پر روشن آفتاب بن کر چمکنے والے معروف قانون دان ایس ایم ظفر 6 دسمبر 1930  کو برما کے شہر رنگون میں پیدا ہوئے، انہوں نے 1945 میں شکرگڑھ سے میٹرک، گورنمنٹ کالج لاہور سے انٹرمیڈیٹ جبکہ قانون کی تعلیم پنجاب یونیورسٹی لا کالج سے حاصل کی۔ایس ایم ظفر کو پنجاب یونیورسٹی کے 124 ویں کانووکیشن میں قانون میں پی ایچ ڈی کی اعزازی ڈگری سے نوازا گیا۔سید محمد ظفر نے 1950  میں جسٹس سردار اقبال کے چیمبر سے وکالت کا آغاز کیا،62 کے آئین میں بنیادی انسانی حقوق کی شقیں ایس ایم ظفر کی ہی کوششوں کا نتیجہ سمجھی جاتی ہیں، 1965 سے 1969 تک پاکستان کے وزیر قانون و انصاف کے طور پر خدمات انجام دیں