اسپین نے فیفا ورلڈکپ 2026 کے فائنل میں دفاعی چیمپئن ارجنٹینا کو شکست دے کر دوسری مرتبہ عالمی چیمپئن بننے کا اعزاز حاصل کر لیا۔
نیو جرسی اسٹیڈیم میں کھیلے گئے فیصلہ کن مقابلے میں دونوں ٹیموں کے درمیان سخت مقابلہ دیکھنے کو ملا، تاہم اسپین نے اضافی وقت میں فیصلہ کن برتری حاصل کی۔ اسپین کی جانب سے فیران ٹوریس نے میچ کے 106ویں منٹ میں گول کرکے اپنی ٹیم کو تاریخی فتح دلائی۔اس کامیابی کے ساتھ اسپین نے نہ صرف ورلڈکپ ٹرافی اپنے نام کی بلکہ مسلسل 38 میچز میں ناقابل شکست رہنے کا عالمی ریکارڈ بھی قائم کر دیا۔اسپین کی دفاعی کارکردگی پورے ٹورنامنٹ میں شاندار رہی۔ عالمی کپ کے دوران اسپین کے خلاف آٹھ میچز میں حریف ٹیمیں صرف ایک گول کرنے میں کامیاب ہو سکیں، جو اس کی مضبوط دفاعی حکمت عملی کا واضح ثبوت ہے۔
تاریخی فتح کے بعد اسپین ایک منفرد اعزاز کا بھی مالک بن گیا۔ وہ دنیا کا پہلا ملک بن گیا ہے جس کے پاس ایک ہی وقت میں مردوں اور خواتین کے فیفا ورلڈکپ ٹائٹلز موجود ہیں۔اس سے قبل اسپین کی خواتین فٹبال ٹیم نے 2023 فیفا ویمنز ورلڈکپ کے فائنل میں انگلینڈ کو شکست دے کر عالمی چیمپئن بننے کا اعزاز حاصل کیا تھا۔اسپین کی یہ کامیابی فٹبال کی تاریخ میں ایک نئے باب کے طور پر یاد رکھی جائے گی، جہاں ٹیم نے شاندار کھیل، مضبوط دفاع اور مسلسل کارکردگی کے ذریعے عالمی سطح پر اپنی برتری ثابت کی۔
