کرپشن، فرائض میں غفلت،15اہلکاروں کو سزائیں

لاہور(کرائم رپورٹر)ڈی آئی جی آپریشنزفیصل کامران نے اختیارات کا ناجائز استعمال، کرپشن، فرائض میں غفلت پرمزید 15 اہلکاروں کو سخت سزائیں سنا دیں۔ نوکری سے برخاستگی، سروس ضبطگی،انکریمنٹ سٹاپ سمیت سخت سزائیں دی گئیں۔ سزاملنے والوں میں انسپکٹر، سب انپسکٹر، کانسٹیبل، سیں نئر اور جونیئر کلرک شامل ہیں۔ تمام افسران و اہلکاروں کو محکمانہ انکوائریاں مکمل ہونے پر سزائیں سنائی گئیں۔ فیصل کامران کا اس موقع پر کہنا تھا کہ کرپشن،اختیارات سے تجاوز کرنے والے عوام اورمحکمہ کے دشمن ہیں۔ خفیہ اطلاعات اور شہریوں کی شکایات پر بعد از انکوائری سزائیں دی گئیں۔ انہوں نے کہا کہ ایک اہلکار کی غلطی فورس کے 30 ہزار جوانوں پر سوالیہ نشان بنتی ہے۔گزشتہ11 ماہ میں 440 اہلکاروں کو سزائیں دی جا چکی ہیں۔ ڈی آئی جی آپریشنز نے کہا کہ محنت و لگن کی بدولت لاہور پولیس نے جرائم میں کمی کر کے عالمی سطح پر خود کو منوایا ہے۔فرائض کی درست ادائیگی سے ہی سروس ڈیلیوری کا معیار بہتر ہو گا.انہوں نے مزید کہا کہ بہترین فورس کی تشکیل کیلئے محکمانہ احتساب کلیدی کردار ادا کرتا ہے۔ لاہور پولیس میں محکمانہ احتساب کا عمل مزید تیز اور سخت کر رہے ہیں۔ چند کالی بھیڑوں کو پورے محکمہ کی بدنامی کا سبب نہیں بنے دیں گے۔