ویب ڈیسک: پشاور کے علاقے ارمڑ میں خٹکو پل کے قریب ایک خاندانی تنازعہ خونریز تصادم میں تبدیل ہو گیا، جس کے نتیجے میں 6 افراد جاں بحق جبکہ ایک خاتون شدید زخمی ہو گئی۔
پولیس کے مطابق جاں بحق ہونے والوں میں 3 خواتین شامل ہیں، جن کی شناخت فضل امین، حضرت امین اور احمد کے ناموں سے ہوئی ہے۔ واقعے کی اطلاع ملتے ہی پولیس اور امدادی ٹیمیں فوری طور پر جائے وقوعہ پر پہنچ گئیں اور زخمی خاتون کو فوری طور پر لیڈی ریڈنگ ہسپتال منتقل کر دیا گیا۔ابتدائی تحقیقات کے مطابق یہ واقعہ خاندانی دشمنی کا شاخسانہ معلوم ہوتا ہے، تاہم پولیس مزید تفتیش کر رہی ہے۔ علاقے میں خوف و ہراس کی فضا قائم ہے اور سکیورٹی اہلکاروں نے جائے وقوعہ سے شواہد اکٹھے کر کے کارروائی کا آغاز کر دیا ہے۔
ولیس حکام کا کہنا ہے کہ ملزمان کی گرفتاری کے لیے خصوصی ٹیمیں تشکیل دی جا چکی ہیں اور جلد اس کیس میں پیش رفت کی توقع ہے۔ مقامی انتظامیہ نے واقعے کے بعد علاقے میں سکیورٹی سخت کر دی ہے تاکہ مزید ناخوشگوار واقعات سے بچا جا سکے۔یہ واقعہ ایک بار پھر پاکستان میں بڑھتے ہوئے خاندانی جھگڑوں اور فائرنگ کے واقعات کی نشاندہی کرتا ہے، جس کے باعث شہریوں میں خوف و عدم تحفظ کا ماحول پیدا ہو گیا ہے۔ پولیس نے عوام سے اپیل کی ہے کہ وہ معلومات فراہم کریں تاکہ مجرموں کو جلد از جلد قانون کے کٹہرے میں لایا جا سکے۔
