پاکستان کے نائب وزیرِاعظم و وزیرِ خارجہ اسحاق ڈار اہم سفارتی دورے پر ریاض پہنچ گئے ہیں، جہاں وہ عرب و اسلامی ممالک کے وزرائے خارجہ کے اہم اجلاس میں شرکت کریں گے۔
ریاض ایئرپورٹ پر پاکستان کے سفیر احمد فاروق اور سعودی حکام نے ان کا استقبال کیا۔ یہ اجلاس سعودی عرب کی میزبانی میں منعقد ہو رہا ہے، جس میں مسلم دنیا کے وزرائے خارجہ شریک ہوں گے۔اس مشاورتی اجلاس میں عالمی اور علاقائی صورتحال، خاص طور پر مسلم ممالک کو درپیش چیلنجز، باہمی تعاون، اور ممکنہ مشترکہ حکمتِ عملیوں پر غور کیا جائے گا۔ ایسے فورمز عام طور پر سفارتی ہم آہنگی بڑھانے، سیاسی مؤقف مضبوط کرنے اور بین الاقوامی مسائل پر مشترکہ لائحہ عمل طے کرنے کے لیے اہم سمجھے جاتے ہیں۔
