گزشتہ رات ہونے والی بارش کے بعد صوبائی دارالحکومت لاہور کا موسم خوشگوار ہو گیا ہے اور گرمی کی شدت میں واضح کمی ریکارڈ کی گئی ہے۔
بارش کے باعث شہر میں درجہ حرارت میں کمی آئی ہے جبکہ شہریوں نے بھی موسم میں آنے والی خوشگوار تبدیلی کا خیرمقدم کیا ہے۔آج صبح سے شہر میں سورج اور بادلوں کے درمیان آنکھ مچولی کا سلسلہ جاری ہے، جس کے باعث موسم نسبتاً معتدل محسوس کیا جا رہا ہے۔ موسم کی بہتری کے نتیجے میں سورج کی تپش میں بھی نمایاں کمی دیکھی جا رہی ہے اور گرمی کا زور پہلے کے مقابلے میں کم محسوس ہو رہا ہے۔محکمہ موسمیات کے مطابق لاہور میں آج بھی بارش کے 50 فیصد تک امکانات موجود ہیں۔ موجودہ درجہ حرارت 32 ڈگری سینٹی گریڈ ریکارڈ کیا گیا ہے، جبکہ دن کے دوران زیادہ سے زیادہ درجہ حرارت 37 ڈگری سینٹی گریڈ تک پہنچنے کا امکان ہے۔
اعداد و شمار کے مطابق شہر میں اس وقت 3 کلومیٹر فی گھنٹہ کی رفتار سے ہوائیں چل رہی ہیں، جبکہ ہوا میں نمی کا تناسب 56 فیصد ریکارڈ کیا گیا ہے، جو موسم کو نسبتاً خوشگوار بنانے میں اہم کردار ادا کر رہا ہے۔محکمہ موسمیات نے پیش گوئی کی ہے کہ آئندہ چند گھنٹوں کے دوران مطلع جزوی طور پر ابر آلود رہ سکتا ہے، جبکہ شہر کے بعض علاقوں میں ہلکی بارش یا بوندا باندی کا بھی امکان ہے۔ ماہرین کے مطابق اگر بارش کا یہ سلسلہ جاری رہا تو درجہ حرارت میں مزید کمی اور موسم میں مزید بہتری آ سکتی ہے۔
