لاہور: صوبائی دارالحکومت لاہور کے مختلف علاقوں میں ہونے والی بارش کے بعد موسم خوشگوار ہوگیا جبکہ گرمی کی شدت میں نمایاں کمی محسوس کی جا رہی ہے۔
تفصیلات کے مطابق لاہور کے متعدد علاقوں میں وقفے وقفے سے بارش ہوئی، جن میں ٹاؤن شپ، کوٹ لکھپت اور پیکو روڈ کے اطراف شامل ہیں۔ اس کے علاوہ مغل پورہ، تاج پورہ، فرخ آباد اور شادی پورہ کے علاقوں میں بھی بارش ریکارڈ کی گئی۔بارش کے بعد شہر کے درجہ حرارت میں کمی آئی اور ٹھنڈی ہواؤں کے باعث شہریوں نے خوشگوار موسم کا لطف اٹھایا۔ کئی علاقوں میں شہریوں نے بارش کے مناظر کو کیمرے کی آنکھ میں محفوظ کیا جبکہ موسم کی تبدیلی سے گرمی سے متاثرہ افراد کو کچھ ریلیف ملا۔محکمہ موسمیات کے مطابق لاہور سمیت پنجاب کے مختلف علاقوں میں مون سون سسٹم موجود ہے، جس کے باعث آئندہ دنوں میں موسم کی صورتحال مزید تبدیل ہونے کا امکان ہے۔ بعض علاقوں میں مزید بارش، تیز ہواؤں اور گرج چمک کے ساتھ بارش کی پیشگوئی بھی کی گئی ہے۔
حکام نے شہریوں کو موسم کی تبدیلی کے پیش نظر احتیاطی تدابیر اختیار کرنے کی ہدایت کی ہے، جبکہ متعلقہ اداروں کو ممکنہ بارش کے دوران نکاسی آب کے انتظامات یقینی بنانے کے لیے الرٹ رہنے کا کہا گیا ہے۔ماہرین موسمیات کے مطابق مون سون بارشوں سے جہاں گرمی کی شدت میں کمی آتی ہے، وہیں بعض علاقوں میں پانی جمع ہونے اور ٹریفک کے مسائل پیدا ہونے کا خدشہ بھی رہتا ہے، اس لیے شہریوں کو احتیاط کا مشورہ دیا گیا ہے۔
