عازمینِ حج کیلئے تربیتی سیشنز کا شیڈول جاری، شرکت لازمی

لاہور میں پنجاب یونیورسٹی میں 28 جنوری سے 4 فروری تک،فیصل آباد میں تربیت 13 اور 14 فروری کو زرعی یونیورسٹی میں ہوگی
سیالکوٹ کے عازمین کیلئے 13 فروری جبکہ گوجرانوالہ میں 6 فروری سے 8 فروری تک صبح و شام روزانہ دو سیشنز منعقد کیے جائیں گے
خواتین کے مسائل اور سوالات کیلئے ہر سیشن میں لیڈی ڈاکٹرز بھی موجود ہوں گی، حج ایپ کے استعمال کی مکمل رہنمائی بھی دی جائے گی
 تربیتی سیشنز میں لازمی شرکت کریں تاکہ حج کے دوران تمام مناسک اور حفاظتی اقدامات بخوبی انجام دے سکیں:حکام کی عازمین حج سے اپیل 
لاہور(آئی این پی) پنجاب حکومت نے عازمینِ حج 2026 کیلئے تربیتی سیشنز کا جامع شیڈول جاری کر دیا، جس کے تحت صوبے بھر میں حج تربیت 28 جنوری سے 14 فروری 2026 تک منعقد ہوگی۔تربیتی سیشنز کا مقصد عازمین کو مناسکِ حج کی مکمل معلومات فراہم کرنا اور ان کی صحت و حفاظت کے حوالے سے ضروری اقدامات سکھانا ہے۔لاہور میں فیصل آڈیٹوریم پنجاب یونیورسٹی میں 28 جنوری سے 4 فروری تک تربیتی سیشنز جاری رہیں گے۔ فیصل آباد میں عازمین کیلئے تربیت 13 اور 14 فروری کو اقبال آڈیٹوریم زرعی یونیورسٹی میں ہوگی۔ اسی طرح سیالکوٹ کے عازمین کیلئے 13 فروری جبکہ گوجرانوالہ میں 6 فروری سے 8 فروری تک صبح و شام روزانہ دو سیشنز منعقد کیے جائیں گے۔خصوصی سیشنز میں پنجاب فوڈ اتھارٹی عازمین کو خوراک کی حفظانِ صحت  پر بریفنگ دیں گی، جبکہ ریسکیو 1122 کے ماہرین فرسٹ ایڈ اور ہنگامی طبی امداد کی تربیت 10 منٹ کے سیشن میں فراہم کریں گے۔ خواتین کے مسائل اور سوالات کیلئے ہر سیشن میں لیڈی ڈاکٹرز بھی موجود ہوں گی۔اس کے علاوہ تربیتی سیشنز میں عازمین کو مناسکِ حج کی عملی تربیت کے ساتھ جدید پاک حج ایپ کے استعمال کی مکمل رہنمائی بھی دی جائے گی، تاکہ وہ ایپ کے ذریعے حج کے دوران اپنی سہولیات اور رہنمائی سے مستفید ہو سکیں۔حکام نے عازمین حج سے اپیل کی ہے کہ وہ مقررہ شیڈول کے مطابق تربیتی سیشنز میں لازمی شرکت کریں تاکہ حج کے دوران تمام مناسک اور حفاظتی اقدامات بخوبی انجام دے سکیں۔