ویب ڈیسک: وفاقی وزیرِ خزانہ محمد اورنگزیب امریکہ روانہ ہوگئے ہیں جہاں وہ ورلڈ بینک گروپ اور آئی ایم ایف کے اجلاسوں میں شرکت کریں گے۔
وزارتِ خزانہ کے مطابق یہ اجلاس پیر 21 اپریل سے شروع ہو کر ہفتہ 26 اپریل تک جاری رہیں گے۔ وزیرِ خزانہ محمد اورنگزیب ان اجلاسوں میں عالمی بینک اور آئی ایم ایف کے اعلیٰ حکام سے ملاقاتیں کریں گے۔اس دورے کے دوران، وزیرِ خزانہ چین، برطانیہ، سعودی عرب اور ترکیہ کے وزرائے خزانہ سے بھی ملاقاتیں کریں گے، جس میں معاشی تعلقات اور مالی معاونت کے بارے میں بات چیت کی جائے گی۔ اس کے علاوہ، وہ امریکا کے اسٹیٹ اور ٹریژری ڈپارٹمنٹس کے اعلیٰ حکام سے بھی ملاقاتیں کریں گے، جن کا مقصد پاکستان کے معاشی حالات اور عالمی اقتصادی پالیسیوں پر تبادلہ خیال کرنا ہے۔محمد اورنگزیب کا دورہ عالمی کریڈٹ ریٹنگ ایجنسیوں، کمرشل بینکوں اور سرمایہ کار بینکوں کے حکام سے ملاقاتوں کا بھی حصہ ہوگا۔
اس دوران وہ سرمایہ کاری فورمز اور سیمینار سے خطاب بھی کریں گے، جس میں پاکستان کی موجودہ معاشی صورتحال اور آئندہ کے معاشی اہداف پر روشنی ڈالی جائے گی۔مزید برآں، وزیرِ خزانہ موسمیاتی اقدام کے لیے قائم وزرائے خزانہ کے اتحاد کی نشست میں بھی شرکت کریں گے، جس کا مقصد عالمی سطح پر موسمیاتی تبدیلیوں سے نمٹنے کے لیے حکومتی اقدامات اور پالیسیوں پر تبادلہ خیال کرنا ہے۔اس دورے کا مقصد عالمی مالیاتی اداروں سے پاکستان کے لیے مالی معاونت حاصل کرنا اور سرمایہ کاری کو فروغ دینا ہے تاکہ ملک کی معیشت کو مزید مستحکم کیا جا سکے۔
