وفاقی وزیر خزانہ سینیٹر محمد اورنگزیب سعودی عرب کے تاریخی شہر العلا میں منعقدہ پہلی اعلیٰ سطحی سالانہ "العلا کانفرنس فار ایمرجنگ مارکیٹ اکانومیز" میں شرکت کے لیے روانہ ہو گئے۔
کانفرنس کی تفصیلات
وزارت خزانہ کے مطابق، وزیر خزانہ کو یہ دعوت سعودی وزیر خزانہ محمد الجدان کی خصوصی دعوت پر دی گئی ہے۔ کانفرنس 16 فروری سے دو روز تک جاری رہے گی، جس میں 48 ممالک کے مندوبین شریک ہوں گے۔ وزیر خزانہ کے مشیر خرم شہزاد بھی ان کے ہمراہ ہوں گے۔یہ کانفرنس انٹرنیشنل مانیٹری فنڈ (آئی ایم ایف) اور سعودی وزارت خزانہ کے اشتراک سے منعقد ہو رہی ہے، جس میں 200 شرکا اور 36 مقررین مختلف معاشی موضوعات پر اظہار خیال کریں گے۔
پاکستانی معیشت اور وزیر خزانہ کی شرکت
وزیر خزانہ محمد اورنگزیب کی کانفرنس میں خصوصی شرکت پاکستان کی معیشت میں حالیہ استحکام اور مثبت اقتصادی اقدامات کو اجاگر کرنے کے تناظر میں کی جا رہی ہے۔بیان کے مطابق، وزیر خزانہ "ابھرتی ہوئی مستحکم منڈیوں کا راستہ" کے عنوان سے ایک اعلیٰ سطحی پینل مباحثے میں بھی شرکت کریں گے، جس کی میزبانی آئی ایم ایف کی منیجنگ ڈائریکٹر کرسٹالینا جارجیوا کریں گی۔ اس مباحثے میں وزیر خزانہ کے ہمراہ مصر، برازیل اور ترکیہ کے وزرائے خزانہ بھی شریک ہوں گے۔
العلا کانفرنس کا مقصد
یہ کانفرنس ابھرتی ہوئی معیشتوں اور ترقی پذیر ممالک کے پالیسی سازوں کو ایک پلیٹ فارم مہیا کرنے کے لیے منعقد کی جا رہی ہے، تاکہ عالمی معاشی چیلنجز، مالیاتی پالیسیوں اور اقتصادی استحکام کے حوالے سے تبادلہ خیال کیا جا سکے۔
عالمی اقتصادی حالات اور کانفرنس کی اہمیت
یہ کانفرنس ایک ایسے وقت میں ہو رہی ہے جب دنیا مسلسل معاشی بحرانوں، تجارتی تنازعات، جغرافیائی کشیدگی اور سخت مالی حالات کا سامنا کر رہی ہے۔عالمی معیشت میں درپیش چیلنجز سے نمٹنے کے لیے اس کانفرنس میں مختلف ممالک کے وزرائے خزانہ، مرکزی بینکوں کے گورنرز، تعلیمی اداروں کے ماہرین، نجی شعبے کے نمائندے اور بین الاقوامی اداروں کے نمائندگان شرکت کریں گے۔یہ کانفرنس ہر سال سعودی عرب میں منعقد کی جائے گی تاکہ ابھرتی ہوئی معیشتوں کے درمیان تعاون کو فروغ دیا جا سکے اور عالمی معیشت کو مزید مستحکم بنانے کے لیے مؤثر پالیسیاں ترتیب دی جا سکیں۔
