وزیراعظم محمد شہباز شریف نے کہا ہے کہ پاکستان کی خوشحالی کسانوں کی خوشحالی سے جڑی ہوئی ہے۔
انہوں نے وزیر اعلیٰ پنجاب مریم نواز کی جانب سے گندم کے کاشتکاروں کے لیے اعلان کردہ خصوصی پیکج کو سراہتے ہوئے کہا کہ اس پیکج کے تحت ساڑھے پانچ لاکھ کاشتکاروں کو براہ راست 15 ارب روپے کی گندم سپورٹ فنڈ کی منظوری ایک خوش آئند قدم ہے۔ اس کے علاوہ، آبیانہ اور فکس ٹیکس میں چھوٹ بھی کسانوں کو ریلیف فراہم کرے گی۔ وزیراعظم نے مزید کہا کہ کسانوں کو چار ماہ تک مفت سٹوریج کی سہولت فراہم کرنے سے گندم کو موسمی اثرات اور مارکیٹ کے دباؤ سے محفوظ رکھا جا سکے گا۔ انہوں نے یقین دہانی کرائی کہ وفاقی حکومت گندم اور اس سے تیار شدہ اشیاء کی برآمد میں حکومت پنجاب کو بھرپور تعاون فراہم کرے گی۔
وزیراعظم نے کہا کہ پاکستان مسلم لیگ (ن) کا منشور ہے کہ کسانوں کو ان کی محنت کا پورا پورا معاوضہ ملے۔ انہوں نے وزیر اعلیٰ پنجاب اور ان کی ٹیم کو گندم کے کاشتکاروں کے لیے اس پیکج کے اعلان پر خراج تحسین پیش کیا اور انہیں مبارکباد دی۔یہ پیکج مسلم لیگ (ن) کے زرعی ترقیاتی منشور کا حصہ ہے، جس میں زرعی شعبے کی بحالی اور کسانوں کی فلاح و بہبود کے لیے متعدد اقدامات شامل ہیں۔ اس پیکج کے ذریعے حکومت کا مقصد کسانوں کو مالی مشکلات سے نکالنا اور زرعی پیداوار میں اضافہ کرنا ہے۔
