پاکستان کے صدر آصف علی زرداری، وزیراعظم شہباز شریف، اور وفاقی وزیرداخلہ محسن نقوی نے سکیورٹی فورسز کو خیبرپختونخوا میں 8 غیر ملکی دہشت گردوں کو ہلاک کرنے پر خراج تحسین پیش کیا ہے۔
صدر زرداری نے قوم کی حمایت کے ساتھ دہشت گردوں کا مکمل خاتمہ کرنے کا عزم ظاہر کیا، جبکہ وزیراعظم شہباز شریف نے کہا کہ ملک کی بہادر سکیورٹی فورسز کے ساتھ قوم فتنہ الخوارج کے مکمل خاتمے تک کھڑی ہے۔ وفاقی وزیرداخلہ محسن نقوی نے دہشت گردی کی لعنت کو جڑ سے ختم کرنے تک چین سے نہ بیٹھنے کا عہد کیا۔پاک فوج کے شعبہ تعلقات عامہ (آئی ایس پی آر) کے مطابق، 12 اور 13 جنوری کو خیبرپختونخوا کے ٹانک ضلع میں سکیورٹی فورسز نے دو انٹیلی جنس بیسڈ آپریشنز کیے۔ پہلے آپریشن میں خوارج کی موجودگی کی اطلاع پر ٹانک میں آپریشن کیا گیا، جس کے دوران 6 خوارج کو ہلاک کر دیا گیا۔ دوسرے آپریشن میں مزید 2 غیر ملکی دہشت گردوں کو ہلاک کیا گیا۔ یہ کارروائیاں سکیورٹی فورسز کی جانب سے دہشت گردوں کے خلاف جاری بھرپور آپریشن کا حصہ ہیں، جس میں دہشت گردوں کے ٹھکانوں کا مکمل صفایا کرنے کی کوشش کی جا رہی ہے۔وزیرداخلہ محسن نقوی نے اس عزم کا اعادہ کیا کہ جب تک دہشت گردی کی مکمل طور پر بیخ کنی نہیں ہو جاتی، حکومت اور سکیورٹی فورسز چین سے نہیں بیٹھیں گے۔
