لاہور میں نئی تعمیرات اور انڈسٹریز کیلئے بارش کا پانی ذخیرہ کرنے کا سسٹم لازمی قرار

 تمام تعلیمی اداروں، بسوں، ویگنوں کے سٹینڈز پر بھی بارش کا پانی ذخیرہ کرنے کا سسٹم لازمی ہوگا: نوٹیفکیشن  جاری‘فوری اطلاق ہوگا
لاہور(سپیشل رپورٹر ) پنجاب حکومت نے مختلف قسم کی تعمیرات کے لیے  بارش کا پانی ذخیرہ کرنے کا سسٹم لازمی قرار دیدیا۔ تفصیل کے مطابق پنجاب حکومت نے  پولٹری، فش فارمز، پیٹرولیم ریفائنریز، ٹیکسٹائل انڈسٹری، گارمنٹس یونٹس، فوڈ انڈسٹری، فلور، رائس ملز، گھی آئل ملز، پیٹرول پمپس اور سیمنٹ پلانٹس میں پانی ذخیرہ کرنے کا سسٹم لازمی قرار دیا ہے۔نوٹیفکیشن کے مطابق شوگر ملز، کیمیکل انڈسٹری، فارما انڈسٹری، پیپر ملز، کھادوں کے یونٹس، ائیرپورٹس، ہاسنگ سوسائٹیز، کمرشل بلڈنگز، ہوٹلز اور میرج ہالز میں بھی بارش کا پانی ذخیرہ کرنے کا سسٹم لازمی قرار دیا گیا ہے۔اس کے علاوہ تمام تعلیمی اداروں، بسوں، ویگنوں کے اسٹینڈز  پر بھی بارش کا پانی ذخیرہ کرنے کا سسٹم لازمی ہوگا۔انتظامیہ کی جانب سے جاری نوٹیفکیشن کے مطابق تعمیراتی کام کی منظوری بارش کے پانی ذخیرہ کرنے کے سسٹم سے مشروط ہوگی جب کہ فیصلے کا اطلاق فوری طور پر ہوگا۔