ایرانی وزیر خارجہ عباس عراقچی نے فیلڈ مارشل سید عاصم منیر سے ٹیلیفون پر رابطہ کیا ہے، جس میں خطے کی تازہ صورتحال اور باہمی دلچسپی کے امور پر تبادلہ خیال کیا گیا۔
ایرانی میڈیا کے مطابق عباس عراقچی نے یہ ٹیلیفونک گفتگو چین کے سرکاری دورے کے دوران کی، جس میں دونوں جانب سے تازہ علاقائی پیش رفت پر خیالات کا تبادلہ کیا گیا۔رپورٹس کے مطابق گفتگو میں علاقائی سلامتی اور دونوں ممالک سے متعلق معاملات پر بھی مشاورت کی گئی۔ یہ رابطہ ایسے وقت میں ہوا ہے جب خطے میں جاری کشیدگی اور مختلف تنازعات کے باعث سفارتی سرگرمیاں تیز ہیں۔ذرائع کے مطابق پاکستانی جانب سے علاقائی کشیدگی کم کرنے، امن و استحکام کے لیے سفارتی کوششوں اور جاری تنازعات کے حل کے حوالے سے بات چیت کی گئی۔ بعض رپورٹس میں کہا گیا ہے کہ گفتگو کے دوران یمن میں حوثی حملوں اور امریکا ایران مذاکرات کی بحالی سے متعلق امور بھی زیر بحث آئے، تاہم ان تفصیلات کی سرکاری سطح پر مکمل تصدیق سامنے نہیں آئی۔رپورٹس کے مطابق پاکستان خطے میں کشیدگی کم کرنے اور مذاکرات کے ذریعے مسائل کے حل کے لیے سفارتی رابطے جاری رکھے ہوئے ہے۔ اس سلسلے میں پاکستان نے ایران اور دیگر متعلقہ فریقوں کے ساتھ رابطے برقرار رکھے ہیں۔
عراقچی اور فیلڈ مارشل عاصم منیر کے درمیان ہونے والی گفتگو کو دونوں ہمسایہ ممالک کے درمیان علاقائی صورتحال پر مسلسل رابطوں کے تناظر میں دیکھا جا رہا ہے۔ ایرانی میڈیا نے بھی تصدیق کی ہے کہ رابطے میں تازہ علاقائی پیش رفت اور دونوں ممالک سے متعلق امور پر تبادلہ خیال ہوا۔یہ ٹیلیفونک رابطہ ایسے وقت میں ہوا ہے جب چین نے بھی ایران اور امریکا پر زور دیا ہے کہ وہ کشیدگی کم کرنے اور مذاکرات کی جانب واپس آنے کے لیے سفارتی کوششیں جاری رکھیں۔
