آسٹریلیا کی 32 سالہ خاتون پولیس افسر جیڈ ہینڈرسن (Jade Henderson) نے اپنی غیر معمولی جسمانی فٹنس کے ذریعے دنیا بھر کو حیران کر دیا — انہوں نے صرف ایک گھنٹے میں 733 پل اپس کر کے گنیز ورلڈ ریکارڈ اپنے نام کر لیا۔
یہ نیا ریکارڈ تقریباً 10 سال پرانے عالمی ریکارڈ کو توڑ کر قائم کیا گیا ہے، جو اس سے قبل آسٹریلیا ہی کی ایک اور خاتون ایوا کلارک کے پاس تھا۔ ایوا کلارک نے 2016ء میں 725 پل اپس مکمل کیے تھے۔ریکارڈ کے بعد گنیز ورلڈ ریکارڈز سے گفتگو کرتے ہوئے جیڈ ہینڈرسن نے کہا:“میں ہمیشہ وہ کام کرنا چاہتی تھی جو کسی نے پہلے نہ کیا ہو۔میں جاننا چاہتی تھی کہ میرا جسم اور دماغ اپنی حد کہاں تک آزما سکتے ہیں۔”ہینڈرسن نے ابتدائی طور پر 24 گھنٹوں میں سب سے زیادہ پل اپس کرنے کا عالمی ریکارڈ توڑنے کی تیاری شروع کی تھی، جو فی الحال اولیویا ونسن کے پاس ہے — انہوں نے 7,079 پل اپس کیے تھے۔
تاہم، تربیت کے دوران بازو کے پٹھے پھٹنے (bicep tear) کے باعث جیڈ کو منصوبہ بدلنا پڑا۔چھ ہفتوں کی بحالی کے بعد انہوں نے فیصلہ کیا کہ وہ ایک گھنٹے میں زیادہ سے زیادہ پل اپس کا ریکارڈ بنانے کی کوشش کریں گی، تاکہ مزید چوٹ سے بچا جا سکے۔ان کی یہ کامیابی نہ صرف آسٹریلیا بلکہ پوری دنیا کے لیے حوصلہ افزا مثال بن گئی ہے، جو عزم، نظم و ضبط اور ذہنی طاقت کی علامت ہے۔
