ویب ڈیسک: سندھ میں حالیہ سیلاب سے متاثرہ علاقوں کے لیے ایک خوشخبری ہے کہ غیر ملکی ادارے کی جانب سے مالی امداد دی جا رہی ہے تاکہ متاثرین کی بحالی اور ترقی کے کام کیے جا سکیں۔
اطالوی ایجنسی برائے ترقی و تعاون نے سندھ کے سیلاب متاثرین کے لیے 40 لاکھ یورو کی مالی معاونت فراہم کرنے کا اعلان کیا ہے۔ اس رقم کا مقصد متاثرہ علاقوں میں رہنے والے سیلاب سے متاثرہ خاندانوں کی فلاح و بہبود اور ان کی مشکلات کو کم کرنا ہے۔اعلامیے کے مطابق یہ رقم خاص طور پر ان افراد کو تحفظ فراہم کرنے کے لیے استعمال کی جائے گی جو خشک سالی اور شدید گرمی کی لہروں سے سب سے زیادہ متاثر ہوئے ہیں۔ مالی امداد کے ذریعے آئندہ 36 ماہ میں متاثرہ اضلاع میں ارلی وارننگ سسٹم (Early Warning System) کی تنصیب اور بہتری میں مدد دی جائے گی تاکہ مستقبل میں موسمیاتی آفات سے بچاؤ کو بہتر بنایا جا سکے۔
اس سلسلے میں فوڈ اینڈ ایگریکلچر آرگنائزیشن (FAO) اور کنسورشیم آف ایمرجنسی سروسز فار ویمن اینڈ انوائرمنٹ (CESVI) کے نمائندوں نے معاہدے پر دستخط کیے ہیں۔ معاہدے کی تقریب میں اطالوی سفیر ماریلینا ارمیلین بھی موجود تھیں۔اطالوی سفیر ماریلینا ارمیلین نے کہا کہ یہ مالی امداد پاکستان کو موسمیاتی آفات کے خطرات کو کم کرنے اور متاثرہ لوگوں کی مدد کے لیے دی جا رہی ہے تاکہ وہ اپنی زندگی بہتر طریقے سے گزار سکیں۔ انہوں نے مزید کہا کہ موسمیاتی تبدیلی کے خلاف لڑائی میں یہ امداد ایک اہم قدم ہے اور پاکستان کے ساتھ تعاون کا سلسلہ جاری رہے گا۔
