کیوبا میں زلزلے کے زور دار جھٹکے محسوس کیے گئے، جس کے بعد شہریوں میں خوف و ہراس پھیل گیا اور لوگ گھروں سے باہر نکل آئے۔
امریکی زلزلہ پیما مرکز کے مطابق زلزلے کی شدت ریکٹر اسکیل پر 6 ریکارڈ کی گئی، جبکہ اس کا مرکز زمین کی سطح سے 11.6 کلومیٹر کی گہرائی میں تھا، جس کے باعث جھٹکے وسیع پیمانے پر محسوس کیے گئے۔مقامی شہریوں کے مطابق زلزلہ اچانک آیا، جس پر کئی افراد خوفزدہ ہو کر گھروں اور عمارتوں سے باہر نکل آئے۔ابتدائی اطلاعات کے مطابق زلزلے سے کسی جانی یا مالی نقصان کی اطلاع موصول نہیں ہوئی۔حکام نے شہریوں سے اپیل کی ہے کہ وہ گھروں میں داخل ہونے سے قبل دیواروں اور چھتوں کی حالت کا جائزہ لیں اور غیر ضروری طور پر عمارتوں میں داخل ہونے سے گریز کریں۔
زلزلے کے بعد ملک کے مختلف علاقوں میں ریسکیو اور ہنگامی انتظامات کو ہائی الرٹ رکھا گیا ہے تاکہ کسی بھی ممکنہ صورتحال سے فوری نمٹا جا سکے۔ماہرین کے مطابق زلزلے کی کم گہرائی کے باعث جھٹکے زیادہ شدت سے محسوس کیے گئے، تاہم کسی بڑے نقصان کی اطلاع سامنے نہیں آئی۔شہریوں نے ہنگامی ہدایات پر عمل کی اہمیت پر زور دیتے ہوئے کہا کہ یہ واقعہ قدرتی آفات سے نمٹنے کے لیے تیار رہنے کی یاد دہانی ہے۔
