برطانیہ کی کاؤنٹی ڈیون اور کارن وال میں پہلی بار ایک جدید نوعیت کی اے آئی ٹیکنالوجی سے لیس کیمرے کا تجربہ کیا گیا ہے، جس کا مقصد نشے کی حالت میں گاڑی چلانے والے ڈرائیورز کو پکڑنا ہے۔
یہ کیمرہ منشیات یا شراب کے استعمال کے بعد گاڑی چلانے والوں کی فوری طور پر نشاندہی کرنے کی صلاحیت رکھتا ہے، جس سے پولیس کو ان ڈرائیورز کا تعاقب کرنے میں مدد ملتی ہے۔
رپورٹ کے مطابق، یہ کیمرہ بغیر کسی انتباہ کے گاڑی چلانے والے افراد کی نشاندہی کرتا ہے اور اس کے بعد پولیس اہلکار اس گاڑی کو روک کر موقع پر ہی فوری تحقیقات شروع کر سکتے ہیں تاکہ یہ پتہ لگایا جا سکے کہ آیا ڈرائیور نے شراب نوشی کی ہے یا غیر قانونی منشیات کا استعمال کیا ہے۔یہ کیمرہ پورٹ ایبل ہے اور اسے سڑک پر کہیں بھی نصب کیا جا سکتا ہے۔ اس کی خصوصیت یہ ہے کہ یہ کسی بھی قسم کی نشے کی حالت میں گاڑی چلانے والے افراد کی فوری نشاندہی کرتا ہے، جس سے پولیس کو اس حوالے سے فوری اقدامات کرنے کی سہولت ملتی ہے۔
کیمرے کو تیار کرنے والی کمپنی "ایکو سینس" کے جنرل منیجر جیوف کولنز نے کہا کہ اس جدید ٹیکنالوجی کے ذریعے اگر ہم خطرات کو وقوع پذیر ہونے سے پہلے ہی پکڑ سکیں تو یہ قیمتی زندگیوں کو بچانے میں مددگار ثابت ہو گا۔ انہوں نے مزید کہا کہ اس ٹیکنالوجی کا مقصد سڑکوں کو مزید محفوظ بنانا ہے اور یہ ٹرائلز اس حوالے سے اہم قدم ہیں۔اس کے استعمال سے نہ صرف سڑکوں پر سیفٹی میں بہتری آئے گی، بلکہ اس کا مقصد نشے کی حالت میں گاڑی چلانے کے نتیجے میں ہونے والے حادثات کو کم کرنا بھی ہے، جس سے کئی جانیں بچائی جا سکیں گی۔
