صنعا: یمنی فوج نے دعویٰ کیا ہے کہ حوثی گروپ نے بحیرہ احمر کے ساحلی علاقے میں واقع موخا بندرگاہ کی جانب دو ہائپرسونک بیلسٹک میزائل داغے ہیں۔
انادولو خبر رساں ایجنسی کے مطابق، یمنی فوج کا کہنا ہے کہ دونوں میزائل موخا بندرگاہ اور بحیرہ احمر کی سمت میں فائر کئے گئے، لیکن فوری طور پر یہ واضح نہیں ہے کہ میزائل اپنے ہدف تک پہنچے یا انہیں راستے میں روک لیا گیا۔موخا یمن کے مغربی ساحل پر واقع ایک اہم بندرگاہ ہے اور بحیرہ احمر کے کنارے واقع ہے۔ یہ خطہ پہلے سے کشیدہ صورتحال کا شکار ہے اور بحری حملوں کے سبب عالمی سطح پر انتہائی حساس سمندری گزرگاہ سمجھا جاتا ہے۔ حوثیوں کی جانب سے حالیہ میزائل اور ڈرون حملوں کے بعد خطے میں بحری سلامتی کے حوالے سے تشویش میں اضافہ ہوا ہے، جس سے عالمی تجارت اور سمندری نقل و حمل کو خطرات لاحق ہونے کا خدشہ ہے۔اس وقت مزید تفصیلات کا انتظار ہے، اور حملوں میں ممکنہ جانی یا مالی نقصان کے بارے میں کوئی فوری اطلاع موصول نہیں ہوئی ہے۔
