صوبائی دارالحکومت لاہور کی فضا ایک بار پھر زہریلی ہو گئی ہے، جبکہ شہر کا ایئر کوالٹی انڈیکس (AQI) خطرناک سطح 270 تک جا پہنچا ہے۔
فضائی آلودگی کے لحاظ سے لاہور کو ملک کا دوسرا آلودہ ترین شہر قرار دیا گیا ہے۔شہر کے مختلف علاقوں میں آلودگی کی شرح خطرناک حد تک بڑھ گئی محکمہ ماحولیات کے اعداد و شمار کے مطابق:
علامہ اقبال ٹاؤن میں آلودگی کی شرح 503 ریکارڈ کی گئی،
راوی روڈ پر 431,
برکی روڈ پر 361,
شالیمار میں 359,
جبکہ سید مراتب علی روڈ پر آلودگی کی سطح 338 ریکارڈ کی گئی۔
یہ سطح عالمی ادارۂ صحت (WHO) کے مقررہ معیار سے کئی گنا زیادہ ہے اور انتہائی خطرناک تصور کی جاتی ہے۔
ماہرین کی شہریوں کو احتیاطی ہدایات
ماحولیاتی ماہرین نے خبردار کیا ہے کہ فضا میں موجود زہریلے ذرات (PM2.5) بچوں، بزرگوں اور سانس کے مریضوں کے لیے شدید نقصان دہ ثابت ہو سکتے ہیں۔
شہریوں کو ہدایت کی گئی ہے کہ:
باہر نکلتے وقت ماسک کا استعمال کریں،
غیر ضروری سفر سے گریز کریں،
اور بچوں کو کھلی فضا میں کھیلنے سے روکیں۔
موسمی صورتحال
محکمہ موسمیات کے مطابق شہر کا موجودہ درجہ حرارت 24 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 32 ڈگری تک جانے کا امکان ہے۔ہوا میں نمی کا تناسب 65 فیصد اور ہوا کی رفتار 3 کلومیٹر فی گھنٹہ ہے، جس کے باعث آلودگی کے ذرات فضا میں معلق ہیں۔محکمہ نے واضح کیا ہے کہ آئندہ 24 گھنٹوں میں بارش کا کوئی امکان نہیں، جس کے نتیجے میں فضائی آلودگی مزید برقرار رہنے کا خدشہ ہے۔
