ویب ڈیسک: ملک کے بیشتر علاقے ان دنوں شدید گرمی کی لپیٹ میں ہیں، جب کہ شہر لاہور میں گرمی کی شدت خطرناک حد تک بڑھ چکی ہے۔
محکمہ موسمیات کے مطابق آئندہ 24 گھنٹوں کے دوران بارش کا کوئی امکان نہیں ہے اور موسم مزید گرم اور خشک رہنے کا امکان ظاہر کیا گیا ہے۔
لاہور میں گرمی کی شدت خطرناک سطح پر، درجہ حرارت 43 ڈگری تک پہنچنے کا خدشہ
لاہور میں موجودہ درجہ حرارت 32 ڈگری سینٹی گریڈ ریکارڈ کیا گیا ہے جبکہ کم سے کم درجہ حرارت 27 ڈگری رہنے کی پیشگوئی کی گئی ہے۔ محکمہ موسمیات کے مطابق آئندہ 24 گھنٹوں میں درجہ حرارت 42 سے 43 ڈگری سینٹی گریڈ تک پہنچ سکتا ہے۔شہر میں ہواؤں کی رفتار صرف 6 کلومیٹر فی گھنٹہ ریکارڈ کی گئی ہے، جو گرمی کی شدت کو کم کرنے میں ناکام ثابت ہو رہی ہے، بلکہ الٹا ہوا کی نمی کم ہونے کی وجہ سے گرمی کی شدت میں اضافہ ہو رہا ہے۔
فضائی آلودگی کی صورتحال تشویشناک، لاہور مضر صحت شہروں میں شامل
شہر لاہور میں فضائی آلودگی بھی خطرناک حدوں کو چھو رہی ہے۔ ایئر کوالٹی انڈیکس (AQI) کے مطابق لاہور میں آلودگی کی شرح 152 ریکارڈ کی گئی ہے، جو کہ عالمی معیار کے مطابق "مضر صحت" زمرے میں آتی ہے۔ماہرین صحت نے شہریوں، خصوصاً سانس، دمہ اور دل کے مریضوں کو خصوصی احتیاط برتنے کی ہدایت کی ہے۔ انہیں ہدایت کی گئی ہے کہ وہ غیر ضروری طور پر گھر سے باہر نہ نکلیں اور ماسک یا حفاظتی تدابیر ضرور اختیار کریں۔
ملک بھر کے دیگر شہروں میں بھی شدید گرمی کا راج
گرمی کی اس لہر نے ملک کے دیگر حصوں کو بھی اپنی لپیٹ میں لے لیا ہے۔ مختلف شہروں میں درجہ حرارت کچھ یوں رہا:
رحیم یار خان: 46 ڈگری سینٹی گریڈ
پشاور، بہاولپور، نوابشاہ: 44 ڈگری
لاہور: 43 ڈگری
اسلام آباد: 42 ڈگری
راولپنڈی: 41 ڈگری
کوئٹہ: 38 ڈگری
کراچی: 37 ڈگری
محکمہ موسمیات نے ہیٹ ویو کے سلسلے کو 20 مئی تک جاری رہنے کی پیش گوئی کی ہے۔ ساتھ ہی بتایا ہے کہ درجہ حرارت معمول سے 5 سے 7 ڈگری زیادہ رہنے کا امکان ہے۔
ماہرین کی شہریوں کو اہم ہدایات
طبی ماہرین نے شہریوں کو ہدایت دی ہے کہ:شدید گرمی میں بغیر ضرورت گھروں سے باہر نہ نکلیں۔دھوپ میں نکلتے وقت سر کو ڈھانپیں اور پانی کا استعمال زیادہ کریں۔
بزرگ شہری، بچے اور بیمار افراد زیادہ احتیاط برتیں۔دن کے اوقات میں خاص طور پر 11 بجے سے 4 بجے تک دھوپ سے بچنے کی ہدایت کی گئی ہے۔
