اسپیکٹرم جیسے بڑھے گا انٹرنیٹ سپیڈ بہتر ہوگی: شزا فاطمہ

 انٹرنیٹ اسپیکٹرم پر دبائو کی وجہ سے مسئلہ ہوا ، جو اسپیکٹرم کیسز عدالت میں تھے وہ ہم نے ختم کرائے ہیں
 ملک میں 25فیصد انٹرنیٹ صارف شامل ہوئے ہیں،وزیر مملکت کاسینیٹ اجلاس میں اظہارِ خیال
اسلام آباد(آئی این پی)وزیر مملکت برائے آئی ٹی و ٹیلی کمیونیکیشن شزا فاطمہ خواجہ نے کہا ہے کہ اسپیکٹرم جیسے بڑھے گا انٹرنیٹ سپیڈ بہتر ہوگی۔سینیٹ اجلاس میں اظہارِ خیال کرتے ہوئے انہوں نے کہا کہ انٹرنیٹ اسپیکٹرم پر دبائو کی وجہ سے مسئلہ ہوا ہے، 500میگا ہرٹز اسپیکٹرم لے رہے ہیں، جو اسپیکٹرم کیسز عدالت میں تھے وہ ہم نے ختم کرائے ہیں۔انہوں نے کہا کہ پاکستان کی سب میرین کی 8 کیبلز آتی ہیں، ان میں سے ایک ڈیڈ ہے، 2 نئی کیبلز آرہی ہیں جس سے انٹرنیٹ میں بہتری نظر آئے گی۔شزا فاطمہ نے کہا کہ پی ٹی اے انٹرنیٹ کی سپیڈ کو اور آڈٹ کرتا ہے، ڈیڑھ سال میں آڈٹ کو دگنا کیا ہے، مالی سال کے پہلے 5 ماہ میں 33 فیصد آئی ٹی ایکسپورٹ میں اضافہ ہوا ہے۔انہوں نے کہا کہ آئی ٹی واحد صنعت ہے جس نے ٹریڈ سرپلس دیکھا ہے، ملک میں 25 فیصد انٹرنیٹ صارف شامل ہوئے ہیں، ہم نے موبائل براڈ بینڈ پر انٹرنیٹ مسئلہ دیکھا، فکسڈ لائن پر مسائل نہیں دیکھے۔شزا فاطمہ نے یہ بھی کہا کہ متعلقہ تنظیم نے ہمیں 3 کمپنیوں کا بتایا جن کو مسائل ہیں، چیک کیا تو معلوم ہوا۔