اسلام آباد: وزیراعظم شہباز شریف نے عمان کے وزیرِ خارجہ سید بدر بن حمد بن حمود البوسعیدی کے دورۂ پاکستان کے موقع پر پاکستان اور عمان کے درمیان 6 معاہدوں اور مفاہمت کی یادداشتوں کے تبادلے کی تقریب میں شرکت کی۔
یہ تقریب آٹھویں پاکستان-عمان مشترکہ وزارتی کمیشن (JMC) کے اجلاس کے دوران منعقد ہوئی، جس کا مقصد دونوں ممالک کے درمیان دوطرفہ تعلقات کو مزید مستحکم کرنا اور مختلف شعبوں میں تعاون کو فروغ دینا ہے۔تقریب کے دوران نائب وزیراعظم اور وزیرِ خارجہ اسحاق ڈار اور عمان کے وزیرِ خارجہ سید بدر بن حمد بن حمود البوسعیدی نے تین اہم دستاویزات پر دستخط کیے۔ ان دستاویزات میں آٹھویں پاکستان-عمان مشترکہ وزارتی کمیشن کے اجلاس کی کارروائی سے متعلق پروٹوکول، سفارتی، خصوصی، سرکاری اور سروس پاسپورٹ رکھنے والوں کے لیے باہمی ویزا استثنیٰ کا معاہدہ اور ریکارڈ و آرکائیوز کے شعبے میں تعاون سے متعلق مفاہمت کی یادداشت شامل ہیں۔اس کے علاوہ تین مزید مفاہمتی یادداشتوں کا تبادلہ بھی کیا گیا، جن پر متعلقہ وفاقی وزراء نے دستخط کیے۔ ان یادداشتوں کا تعلق اطلاعات و نشریات، انفارمیشن ٹیکنالوجی و ٹیلی کمیونیکیشن اور خبروں کے تبادلے سمیت ذرائع ابلاغ کے شعبوں میں تعاون سے ہے۔
ان معاہدوں اور مفاہمتی یادداشتوں کے ذریعے پاکستان اور عمان کے درمیان معلومات کے تبادلے، میڈیا تعاون، ڈیجیٹل شعبے میں اشتراک اور سرکاری ریکارڈ کے تحفظ و انتظام جیسے امور میں تعاون کو فروغ دینے کی راہیں ہموار ہوں گی۔پاکستان اور عمان کے درمیان دیرینہ دوستانہ تعلقات قائم ہیں، جبکہ دونوں ممالک مختلف شعبوں میں باہمی روابط کو مزید وسعت دینے کے خواہاں ہیں۔ چھ معاہدوں اور مفاہمتی یادداشتوں کا تبادلہ اسی مشترکہ عزم کا اظہار ہے کہ دوطرفہ تعاون کو مضبوط بنایا جائے اور مستقبل میں باہمی مفاد کے مزید مواقع پیدا کیے جائیں۔
