خیبر پختونخوا، کشمیر اور گلگت بلتستان میں شدید بارشوں، سیلابی ریلوں اور برفانی جھیلوں کے پھٹنے سے جانی نقصان بڑھ کر 146 ہو گیا ہے۔
بونیر ضلع سب سے زیادہ متاثر ہوا، جہاں لینڈ سلائیڈنگ اور سیلابی ریلوں کے باعث 78 افراد لقمہ اجل بن گئے۔ آزاد جموں و کشمیر میں سات اور گلگت بلتستان و پنجاب میں دو دو افراد ہلاک ہوئے۔ضلع باجوڑ میں بادل پھٹنے اور لینڈ سلائیڈنگ کے نتیجے میں 21 افراد جاں بحق اور متعدد زخمی ہوئے جبکہ کئی مکانات مکمل طور پر تباہ ہو گئے۔ مانسہرہ کے علاقے بٹل میں سیلابی ریلے اور چھت گرنے کے حادثات میں 14 افراد ہلاک ہوئے، جب کہ لوئر دیر اور شانگلہ میں بھی کئی افراد کی جانیں ضائع ہوئیں۔گلگت بلتستان میں برفانی جھیلیں پھٹنے سے متعدد افراد لاپتہ ہوئے جبکہ دریائے سندھ چلاس میں اپنے کنارے سے باہر بہنے سے مکانات متاثر ہوئے۔ آزاد جموں و کشمیر کی وادی نیلم میں پل، گیسٹ ہاؤسز اور سڑکیں سیلابی پانی میں بہہ گئیں، اور 500 افراد، بشمول آزاد جموں و کشمیر کے وزیر، پھنس گئے، جن میں سے 60 سیاح محفوظ مقامات پر منتقل کر دیے گئے۔
صوبائی ڈیزاسٹر مینجمنٹ حکام کے مطابق خیبر پختونخوا میں 146 اموات میں 124 مرد، 10 خواتین اور 12 بچے شامل ہیں۔ متاثرہ اضلاع میں ریسکیو آپریشن جاری ہے، اور وزیراعظم شہباز شریف نے کلاؤڈ برسٹ سے متاثرہ علاقوں میں ریسکیو کارروائیوں کو تیز کرنے کی ہدایت کی ہے۔محکمہ موسمیات نے شمال مغرب کے لیے شدید بارش کا الرٹ جاری کیا ہے اور عوام سے کہا ہے کہ وہ خطرناک علاقوں میں غیر ضروری نقل و حرکت سے گریز کریں۔ موسمیاتی ماہرین نے خبردار کیا ہے کہ موسمی تبدیلیوں کے اثرات سے پاکستان میں مون سون کے دوران شدید اور غیر معمولی سیلابی واقعات بڑھ رہے ہیں، جس سے ہر سال انسانی و مالی نقصان کے امکانات میں اضافہ ہوتا ہے۔
