ویب ڈیسک:دبئی سپورٹس کونسل نے سابق بھارتی ٹینس سٹار ثانیہ مرزا کو کھیلوں کا سفیر مقرر کرنے کا اعلان کیا ہے۔
ثانیہ مرزا نے اس اعزاز پر خوشی کا اظہار کرتے ہوئے سوشل میڈیا پر اس تقریب کی کچھ تصاویر شیئر کیں، جن میں دبئی سپورٹس کونسل کی جانب سے منعقدہ تقریب کی جھلکیاں دکھائی گئیں۔ انسٹاگرام پر اپنی پوسٹ میں ثانیہ مرزا نے لکھا کہ دبئی کے لیے کھیلوں کا سفیر بننا ایک بے حد اعزاز کی بات ہے اور یہ ایک ناقابلِ یقین موقع ہے۔ انہوں نے دبئی سپورٹس کونسل کا شکریہ بھی ادا کیا، جو انہیں اس اعزاز کے قابل سمجھا۔ثانیہ مرزا کی اس کامیابی پر ان کے مداحوں کی جانب سے سوشل میڈیا پر مبارکباد کے پیغامات بھی آرہے ہیں۔ اس تقریب میں ثانیہ مرزا کے علاوہ یو ایف سی چیمپئن خبیب نورماگومیدوف اور سابق بھارتی کرکٹر ہربھجن سنگھ جیسے اہم کھیلوں کے ستارے بھی موجود تھے۔
دبئی سپورٹس کونسل کی بنیاد 2005 میں رکھی گئی تھی اور یہ دبئی میں کھیلوں کی ترقی کو فروغ دینے کے لیے کام کر رہی ہے۔ اس کونسل کا مقصد دبئی کے کھیلوں کے شعبے کو مضبوط کرنا اور مقامی سطح پر کھیلوں کی سرگرمیوں کی ترویج کرنا ہے۔ یہ کونسل دبئی کے سات مقامی سپورٹس کلبز کے کام کی نگرانی بھی کرتی ہے اور اس کا ایک اہم مقصد خواتین اور بچوں میں کھیلوں کی سرگرمیوں کو فروغ دینا ہے۔ اس کے علاوہ، دبئی سپورٹس کونسل کھیلوں کی دنیا میں کامیاب شخصیات کو تسلیم کرنے اور انہیں معاشرتی ترقی کے لیے استعمال کرنے کے لیے بھی سرگرم ہے۔ثانیہ مرزا کو کھیلوں کے سفیر کے طور پر منتخب کرنے کا مقصد دبئی میں کھیلوں کی پزیرائی اور انفرادی کامیابیوں کو دنیا بھر میں اجاگر کرنا ہے، اور اس سے دبئی کے کھیلوں کے شعبے کو مزید عالمی سطح پر متعارف کرانے میں مدد ملے گی۔
