ایران کی قومی فٹبال ٹیم نے 2026 فیفا ورلڈ کپ کے لیے اپنی نئی ہوم کٹ باضابطہ طور پر متعارف کرا دی ہے، جسے ایک مقامی اسپورٹس برانڈ نے تیار کیا ہے۔
نئی جرسی بنیادی طور پر سفید رنگ پر مشتمل ہے اور اس کے ڈیزائن میں 2022 ورلڈ کپ کٹ کی جھلک بھی نمایاں طور پر دیکھی جا سکتی ہے۔ جرسی پر ایشیائی چیتے (Asian cheetah) کا واٹرمارک دوبارہ شامل کیا گیا ہے، جو ایران کی فٹبال شناخت اور قدرتی ورثے کی علامت سمجھا جاتا ہے۔اس کے علاوہ جرسی کی آستینوں پر جانوروں کی کھال سے متاثرہ ٹونل پیٹرن بنایا گیا ہے، جبکہ کناروں پر ایرانی پرچم کے رنگ نمایاں ہیں۔ سرخ رنگ کے لوگوز اور نمبرز بھی ڈیزائن کا حصہ ہیں، جو اسے ایک منفرد اور جدید اسپورٹس لک فراہم کرتے ہیں۔ایران کی سرکاری خبر رساں ایجنسی کے مطابق قومی ٹیم پیر کے روز ترکیہ روانہ ہوگی جہاں انطالیہ میں ورلڈ کپ سے قبل تیاریوں کا خصوصی تربیتی کیمپ لگایا جائے گا۔ اس دوران ٹیم دو دوستانہ میچز بھی کھیلے گی تاکہ کھلاڑیوں کی فارم اور کمبی نیشنز کو بہتر بنایا جا سکے۔
تہران کے انقلاب اسکوائر میں گزشتہ روز قومی ٹیم کے لیے ایک خصوصی الوداعی تقریب بھی منعقد کی گئی، جس میں کھلاڑیوں، کوچنگ اسٹاف، فٹبال فیڈریشن حکام اور کھیلوں سے وابستہ شخصیات نے شرکت کی۔ تقریب میں ٹیم کا آفیشل ترانہ اور نئی ورلڈ کپ جرسی بھی پیش کی گئی۔ایران کو 2026 ورلڈ کپ کے گروپ جی میں بیلجیم، مصر اور نیوزی لینڈ کے ساتھ رکھا گیا ہے۔ ٹیم اپنا پہلا میچ 16 جون کو لاس اینجلس میں نیوزی لینڈ کے خلاف کھیلے گی، جس کے لیے تیاریوں کو حتمی شکل دی جا رہی ہے۔
